Ababalisi bathi ukwehla kwenani labantwana abapase imihloliso yeA Level nyakenye akumangalisi ngoba izifundo ziphazanyiswe ngumkhuhlane weCovid-19 kanye lokukhalala kwabo umsebenzi bekhonona ngeholo eliphansi.
Ugatsha lwezemfundo luveze izolo ukuthi phakathi kwabafundi abazinkulungwane phose ezingamathsumi amahlanu , 49,153, kupase abazinkulungwane phose ezingamatshumi amane, 39,802.
Ngamanani aphakathi kwekhulu, ama-percentages, inani labapasileyo lehle lisuka ku83.1 percent ngomnyaka ka2019 laya ku81 percent nyakenye, okutsho ukuthi lehle ngokwedlula okubili ekhulwini, 2.1 percent.
Ababalisi, bona abaphakathi kokukhalala umsebenz ngokufundisa okwamalanga amabili kuphela ngeviki bekhala ngeholo eliphansi, bathi nxa udaba lweholo lungalungiswanga, abantwana abanengi abasoze baphumelele kumihloliso njalo lonyaka.
Kodwa umgcinisihlalo wogatsha lwemihloliso olweZIMSEC uMnu Eddie Mwenje utshele umsakazo weZBC ukuthi bayajabula ngempumela yanyakenye le ngoba abafundi abanengi bapasile lanxa nje bengazange bafunde ngemfanelo ngenxa yomkhuhlane weCovid-19.
UNtungamili Nkomo weStudio 7 uxoxe lesiphathamandla senhlanganiso yababalisi eyeProgressive Teachers Union of Zimbabwe (PTUZ) uNkosikazi Nokuthula Hlabangana.
Your browser doesn’t support HTML5
Ingxoxo loNkosikazi Hlabangane