Izakhamizi zemaphandleni esabelweni seZansi yemaNdebeleni seziqalile amalungiselelo okulima kodwa zikhala ngentengo yenhlanyelo ephezulu, okulakho ukudala ukuthi zingalimi njengalokhu ezikufisayo.
Izakhamizi esixoxe lazo zithi kulezinsuku ihloka likhala njalonje ehlathini lapho kubiywa emasimini kulungiselelwa ukulima ngoba izulu seliseduze.
Lanxa amalungiselelo sekubanga eliphezulu inengi lithi alilanhlanyelo eyeneleyo emakhaya kukanti ezitolo khona kayibambeki ngoba intengo isidla phezulu.
UMnu Zwelithini Gabula oyisakhamuzi seSitezi eGwanda North uthi inengi lezakhamizi emakhaya ngeke zenelisa ukuthenga inhlanyelo ezitolo.
UNkosikazi Siphathisiwe Mthombeni yena osuka eSilikwe eGwanda North laye ukhala ngentengoyenhlanyelo ephezulu.
UMnu Gabriel Luphondo oyisakhamuzi seMawane uthi bazasebenzisa inhlanyelo abayithole kusivuno sanyakenye.
UMnu Finish Ncube odabuka kuWard 7, koMalaba phansi kwenduna uMalaba, eMatobo laye uthi balinde inhlanyelo kaGatshompu ngoba ingekho ezitolo zasemakhaya.
Kune izulu ebelilomoya omkhulu eManama ngeSonto edluleyo ladala umonakalo omkhulu ngemva kokuba uphahla lwendlu yokubelethela esibhedlela seManama luthethwe ngumoya.
Kusenjalo amapholisa eGwanda athi asethole izifuyo ezedlula ikhulu ngemva kokuhlasela eTshanyaugwe kuviki eyedlulileyo.
Isikhulumeli samapholisa esabelweni seZansi yemaNdebeleni uNkosikazi Loveness Mangena utshele umsakazo weStudio 7 ukuthi phakathi kwalezinkomo ezinye sezitholwe ngabanikazi.
Uphinde wathi sebebophe uCastro Ndlovu ocatshangelwa ukuthi lisela lenkomo kodwa esebenza kuhulumende esigabeni seNhwali yena otholakale lenkomo ezedlula amatshumi amabili 25 ezitshontshiweyo.
Amapholisa athi adinga UPrince Dube ngamehlo abomvu oyaziwa njalo ngokuthi nguVusa Mthopini oweTshanyaugwe yena ocatshangelwa ukuthi ulesandla ekutshontshweni kwezinye zalezinkomo ezitholakaleyo.
Abalenkomo ezacatshayo bakhuthazwa ukuthi bayefika eGwanda Showgrounds elapho lezinkomo ezigcinwe khona mhlawumbe belakho ukuhlangana lezabo.
Your browser doesn’t support HTML5
Udaba Lwezemaphandleni