Abake badlalela ele Zimbabwe kwezenguqu lababake baliqeqetsha leliqembu bathi iZiimbabwe kayamukele isijeziso eyasetheswa yinhlnganiso ephethe ezenguqu emhlabeni wonke jikelele eyeFIFA isola ukungenela kukahulumende weZimbabwe kwezenguqu.
Lokhu kulandela ukumiswa umsebenzi ngomnyaka ophelileyo kwabaphathi benhlanganiso yezenguqu eZimbabwe yeZIFA lugatsha lukahulumende lwe Sports & Recreation Commission SRC besetheswa umlandu wokuba lenkohlakalo lobusela kunye lokuhlukumeza onompembe besifazana.
Inengi labasekela umdlalo wenguqu kweleZimbabwe bamukela isijesiso lesi besithi abakhokheli benguqu eZimbabwe balenkohlakalo kakhulu kumele kulungiswe kuqala.
Umdlali odumileyo owake wadlalela amaqembu amakhulu eBhilithane njalo ubengumsekeli kamqeqeshi weQembu lama Warriors, uBenjani Mwaruwari, uvumelana labo uthi akulungiswe izinto ezonakeleyo kuqala.
"Kubalulekile ukuthi sihlale phansi si restructure sibone ukuthi ibhola lethu laliphambaniseka kuphi. Siyafuna ukulingisa lebhola leli singene kuma positions asiyenza ukuthi sibonakale ukuthi sibuye sizeqondisa leli ibhola leli but kumele kube le balance ukuthi kungaba lama former players at the top. Ngihlala ngikhuluma nje ukuthi kungaba le one olidayo, then yenalowo oyi one kumele azisarawunde labantu abakwaziyo. Into ezazihlupha siyazazi sizihlalele phansi sibone ukuthi sizenza ngemfanelo."
UMzondiwa Mugadza owake wadlalela iqembu laMazulu leZimbabwe Saints kunye lama Warriors uthi inkokheli zemdlalo wenguqu yizo ezibulele ibhola.
"Kakhulukazi ngokubona kwami abantu abasebefikise ibhola to istage le, ngabantu abangalathando lebhola, basemahofisini ukuthi bona bafuna ukuthi bathathe izimali njengento esiyaziyo into eyenzakalayo all along ekhaya ngendaba zebhola. Nxa ukuthi asisakhoni sidlale ama international games kuza affector kakhulukazi abafana abakhulayo so bayabe bengasakhoni ukuthi badlale lamanye ama countries ukuthi babonakale nxa ukuthi ade belama opportunities ukuthi bathengwe abroad."
Amazwi kaMzo agcizelelwa nguMadinda Ndlovu, umdlali owaba lodumo olukhulu edlalela iqembu lenguqu leHighlanders, wabangumqeqeshi walo njalo waqeqesha kakhulu kwele Botswana.
"Kuzamela ukuthi khona siqale silungise ibhola lethu eZimbabwe and then after that silobele iFifa ukuthi besuse isuspension. Siyakwazi sonke ukuthi ibhola lethu lilama faults here and there.”
Ngaphandle kwenkohlakalo isimo somnotho laso sibisela ibhola lenguqu emuva kweleZimbabwe. UCharles Mhlauri ngumqeqetshi wenguqu olodumo owaqeqetsha lama Warriors yena uthi akulungiswe ngokushesha ezenguqu eZimbabwe.
"Osokufuze kwenzakale yikuthi silandele ke manaje into ezifunwa yiFifa singabe singavumelani lakho but okufuze sikuqakathekise yikuthi iFifa is an independent body, izimele as a country sidinge indlela yokuthi sisebenze le Fifa yakhona at the same time sizame ukuqondisa lapho okutsheke khona. Silama problems aqakathekileyo ungabona uma ieconomy yethu ingamanga kuhle then thina sithi l know ibhola lizahamba kuhle akuhambelani.”
Ugatsha luhulumende weZimbabwe olweZimbabwe Sports Commission libhalele iFifa licela ukuthi isigwebo sesulwe. UXolisani Gwesela yisikhulumi senhlanganiso yeZifa.
"Simelele nje ukuthi impumela izabakhona, sibone ukuthi kuyahamba njani but silethemba lokuthi phambili laphana Iban esilayo leyi izakhitshwa into zonke zibe normal. But engingakutsho khathesi yikuthi inguqo yala eZimbabwe konke kuhambelela phambili.”
IFifa ixotshe eleZimbabwe ukuthi lingasadlali ezenguqu lamanye amazwe ngenyanga ephelileyo okwenza abadlali kubazwise ubuhlungu ngoba befuna ukubonakala kwamanye amazwe ukuze bazithengise. Kukanti amaqembu eZimbabwe avunyelwa ukudlala wodwa.