Ingcitshi kwezombusazwe lenhlalakahle kazulu zithi uhulumende kumele aphume lamacebo enhlelo zokubona ukuba uzulu odubekayo uyathola usizo ngalesi sikhathi sokubhekana lobunzima obudalwa yikungamanga kuhle komnotho welizwe. UMlondolozi Ndlovu usethulela loludaba ngokugcweleyo.
Lokhu kuza ngesikhathi intengo yempahla iqhubeka ikhuphuka eZimbabwe, kuthi lesisindo se mali laso siqhubeka sisiwa ngesiqhubu esesabekayo osokudala ukuba iholo lezisebenzi lingasancedi lutho.
Ingcitshi kwezomnotho zithi uhulumende we Zimbabwe kumele athathe amanyathelo okuncedisa ngakho konke angakwenelisa ukunikeza abadubekayo imali loba ukudla ngoba bezabulawa yindlala angagoqa izandla.
UMnu Limbert Chikukwa ingcitshi ecubungula ezomnotho esebenzela ekolitshini ele University of Zimbabwe, uthi kumele uhulumende abeke eceleni imali yokuncedisa abadubekayo.
“Uhulumende kumele azame ukwenzala abantu okunengi. UMnotho ususinda. Intengo yempahla isidula kakhulu. Abantu abasenelisi ukuthenga ukudla. Umnotho wethu usunzima, uhulumende kaphe abantu ukudla impuphu”
Lokhu kusekelwe ngeyinye ingcitshi uMnu Tapiwa Dube yena othi udubo oluselizweni aluselani lokuba abantu bayasebenza loba hatshi.
“Uhulumende ngabe uyaphathisa lokuncedisa esingabathi ngabantu abangatholiyo. Okwakhathesi sokome kakhulu. Imali yethu ayisathengi eye Melika layo akula abalayo”
UNkosikazi Beatrice Sikhosana isakhamuzi se Harare uthi kumele uhulumende asebenzise amabizo ayelawo ngesikhathi se Covid-19 awabantu abadubekayo aphange abasize ngoba udubo oluselizweni lulakho ukudala ubusela.
“Ukukhwela kwentengo lokhu sokusihlupha kakhulu. Thina abasebenzayo singcono, uhulumende ngabe uyasebenzisa amabizo abantu ababhalisa udubo ngesikhathi se Covid-19. Kungacina sekulamasela nxa lokhu kungalungiswanga”
Inengi lihola imali yakwele Zimbabwe kuthi yonke impahla isithengiswa lokuthengwa ngedola le Melika.
Indleko yezinto zonke ezimqoka empilweni kazulu egoqela amafutha ezimota, imbadalo yokugada amabhasi lemitshova, ukudla, imithelo yezindlu, imbadalo zesikolo lokunye isibizwa ngedola le Melika.
Ingcwethi ezicubungula ezenotho zithi isilinganiso esikhulu sabantu eZimbabwe, sebebanjwa ngamandla ukuba babe kuhlangothi lwabazisebenzayo, kungasikho kuthanda kwabo kodwa kungu mumo oselizweni odale ukuvalwa kwamafekitali amanengi ayeqhatshe abantu.
Uzulu ukhala njalo ngodubo lwentengo ezehlukeneyo kusiya ngokuthi umuntu uyabe ethenga ngedola leMelika loba ele Zimbabwe osokuphazamisa njalo abazisebenzayo, impilo isiba nzima ngamandla. Lezi nkinga ziphinde zengezelelwa yikuqhamuka kobhubhane lwe Covid-19.
Ingcwethi kwezenotho zithi lanxa zisamukela inyathelo likahulumende lokwehlisela abalezimali zabo umthelo we-duty nxa befuna ukuthenga izinto ezimqoka empilweni yabantu yansuku zonke, phandle kwelizwe, ezifana lokudla, kubalulekile ukuthi uhulumende aphume lamacebo kanye lenhlelo ezilohlonzi zokulungisisa isimo somnotho welizwe.
Your browser doesn’t support HTML5
Udaba lokonakala kwesimo somnotho siluphiwa nguMlondolozi Ndlovu