Lanxa ibandla leZanu PF likulandula ukuthi amalunga alo yiwo abangele udlakela koBulawayo izolo emhlanganweni wekomidi yephalamende ebona ngezabatsha, abatshayiweyo bathi ngempela batshaywe ngabasekeli bebandla elibusayo.
Ikomidi le, yona ebikhokhelwa nguMnu Omega Sibanda, iqhube lumhlangano ngenjongo yokuzwa imbono kazulu mayelana ngokuvuselelwa kohlelo lweNational Youth Service.
Abatsha abacatshangelwa ukuthi ngabebandla leZanu PF bachithe lumhlangano ngokutshaya abanye balabo abethule imbono yabo besithi kabafuni loluhlelo luvuselelwe.
Uhlelo lolu lulembali yokusetshenziswa nguhulumende ukulolonga ontanga abalodlakela abaziwa ngokuthi ngama-green bomber abasuke basetshenziswe yiZanu PF ukutshaya abantu, ikakhulu ngesikhathi sokhetho.
Isikhulumeli seZanu PF uMnu Tafadzva Mugwadi utshele iStudio 7 ukuthi kungamanga ukuthi abebandla lakhe yibo abadale loludlakela.
Uthe njalo abatshayiweyo ngabebandla lakhe.
Kodwa omunye wabatshayiweyo uMnu Eric Gono uyakulandula lokhu. Uthi njalo abamtshayileyo bagoqela amalunga eZanu PF awaziyo.
Your browser doesn’t support HTML5
Ingxoxo loMnu. Eric Gono