WASHINGTON DC - Amapholisa akoBulawayo ngoMgqibelo avimbe ikhonsathi ebiqoqwe yinhlanganiso yeElection Resource Center (ERC) ibambisane lezinye inhlanganiso ezimeleyo ngenjongo yokukhuthaza uzulu wakulelidolobho ukuthi abhalisele ukuvota ngobunengi.
Umcimbi lo ubumele wenzelwe eHartsfield Tshisanyama lapho obekuzahlabela khona abaculi abagoqela uEspah, eEnzo Ishall, loHoly Ten. Ukuze umuntu angene ubemele aze lokuliphetshana okuveza ukuthi sowabhalisela ukuvota kukhetho oluzayo.
Amapholisa abikwa ayewuvumele lumcimbi kodwa avuke esejikisile.
Umkhokheli weERC uNkosikazi Barbra Bhebhe ubengadobhi ucingo lwakhe kanti lesikhulumeli samapholisa uMnu Paul Nyathi laye sehlulekile ukukhuluma laye.
Umkhokheli wenhlanganiso yeIbhetshu Likazulu uMnu Mbuso Fuzwayo usole kakhulu amapholisa esithi uhulumende uzama ukwenqabela abantu ukubhalisa ngoba esazi ukuthi uzanqotshwa kungavota abantu abanengi.
Your browser doesn’t support HTML5
Ingxoxo loMnu Mbuso Fuzwayo
Ibandla leZanu PF lona lithi alilakuthandabuza ukuthi lizanqoba ibandla leCCC kukhetho lomnyaka ozayo.
Ngakolunye uhlangothi, umkhokheli weCCC uMnu Nelson Chamisa uthi ngaphandle kokuthi uMongameli Emmerson Mnangagwa lebandla lakhe baqilibezelwe, uzanqoba angene embusweni.