Sekubotshwe abanye abantu ababili ngodaba lodlakela oluqhamuke eMurehwa North ngempelasonto edluleyo, lapho okutshaywe kabuhlungu asebekhulile abangamalunga ebandla leCitizens Coalition for Change (CCC), ngabatsha abacatshangelwa ukuba ngabebandla leZanu PF.
Isikhulumeli samapholisa, uSenior Assistant Commissioner Paul Nyathi, wethule umbiko enkundleni yeTwitter othi sebebophe abanye njalo ababili mayelana lodaba lolu - uPaul Kachigu, oleminyaka emgamatshumi amathathu lane – 34, kanye loDignity Nadzo yena oleminyaka engamatshumi amathathu lanye – 31.
NgolweSibili, kubotshwe uNever Chimutashu oleminyaka engamatshumi ayisithupha lasikhombisa – 67, laye owetheswa cala linye. UNyathi uthe amapholisa alokhu ephakathi kokudingisisa bonke abaphatheka kuloludlame.
Ngenyanga kaMfumfu, umeli wako-Bulawayo edale lephalamende, uNkosikazi Jasmine Toffa, laye watshaywa ndawonye lamanye amalunga eCCC esigabeni seNsiza, eMatabeleland South, lapho ababekhankasela ibandla labo kumcintiswano wokhetho lwama-by-elections, kodwa akuzange kwabotshwa muntu.
Kuthi eMatobo nyangenye, kwabalodlame njalo lapho okwalimala amalunga ambalwa awebandla leli, agoqela abesifazane. Lakho akuzange kwabotshwa muntu.
Umsekeli wesikhulumeli seCCC, uMnu. Gift Ostallos Siziba, uthi, "Sithole lathi-ke umlayezo otshengisa ukubana kulabantu ababotshiweyo mayelana lendaba yodlame olwayenzekala eMurehwa. Into esiyikhangeleleyo njalo esizayi-emphasizer njengebandla yikubana abantu abayenza udlame lodlakela, lokuhlukumeza abantu, ngabantu abayazakalayo, njalo amapholisa afanele enze konke okuphakathi kwamandlaa abo, ngenxa yokubana bale-mandate ukuba be-make sure abantu bonke laba bayabanjwa kulandelwe umthetho."
SEE ALSO:
Ingxoxo Esiyenze LoMnu. Gift Ostallos Siziba