Umkhokheli webhanga leAfrican Development Bank uMnu. Akinumqi Adesina ofike izolo ntambama eZimbabwe utshele intathelizindaba ukuthi ulethemba lokuthi umhlangano ocubungula ukwesula izikwelede Iilizwe elilazo, ozaqhutshwa lamuha, uzaphuma lezinqumo ezimqoka.
Utshayele ihlombe umongameli Emmerson Mnangagwa, kanye lomphathintambo wezemali uMnu. Mthuli Ncube, wathi batshengisa ukuzimisela kuloludaba.
UMnu. Adesina uthe uyathokoza ngokuthi owayengumongameli weMozambique, uMnu. Joaquim Chissano, ofike eZimbabwe ngeSonto, nguye ozakhokhela lumhlangano.
Umhlangano lo ngowesibili kudaba lokuxazulula ukuthi eleZimbabwe lingacitshelwa na isikwelede esedlula amadola angamabhiliyoni ayisithupha-six billion esemali eyabolekwa kwamanye amazwe.
Lokhu kungenzeka, eleZimbabwe lizenelisa ukweboleka imali kwezinye inhlanganiso zomhlaba.
Abanye abazaphatheka kulumhlangano babalisa amazwe alitshumi lasikhombisa, ibhanga le World Bank, kanye leleEuropean Investment Bank. Bazacubungula ukuthi uhulumende weZimbabwe uluqhuba njani uhlelo lokuguqula inhlelo zakhe zombusazwe kanye lezomnotho, ezigoqela ukuhlawula abalimi abamhlophe abathathelwa amapulazi kuhlelo lokwabiwa kutsha komhlaba.
UMnu. Adesina wemukela isikhalazo seZimbabwe ngenyanga kaNtulikazi kuwonalo umnyaka, esokuthi ilizwe lesulelwe izikwelede zalo ukwenzela ukuthi lenelise ukuboleka imali kwezinye inhlanganiso zomhlaba.
Ukuze sihlaziye ukuthi lelinyathelo lingaphathisa eleZimbabwe, uSithandekile Mhlanga weStudio 7 uxoxe loMnu. Masimba Kuchera, ingcwethi ecubungula ezomnotho welizwe.
Your browser doesn’t support HTML5
Ingxoxo loMnu. Masimba Kuchera.