BULAWAYO - UMadodana Horsepower Tshabangu ufuna ukuvuselela umncintiswano weHorsepower Off-Season Tournament.
Umncintiswano weHorsepower Off – Season tournament uke waduma kakhulu eminyakeni edluleyo kodwa usuleminyaka embalwa ungasadlalwa njalo uTshabangu uthi imizamo yokuwuvuselela iqale nyakenye.
“IHorsepower Off – season tournament isilesikhathi ingekho ngoba izinto zike zantshintsha sabhekana lodubo njani njani. Ngilethemba ukuba lonyaka izakuba khona ngoba nyakenye iphutha elasuka laba khona yikuba saphuza ukuphiwa inkundla zokudlalela.
“Angifuni kuqamba amanga kodwa abafana bagcwele. Inengi labo kabayazi iHorsepower tournament kodwa ngifisa ukuba bathole ithuba bangene phakathi eWhite City njengalokhu okwakusenziwa ngaboBenjani Mwaruwari owayegada indizamtshina esuka eFrance ezodlala kuHorsepower. Ngikhumbula ngomunye umnyaka kubuya aboWesley Gilbert bebuya bebizwe yiAmavevane bebuya bezodlala bevela eHarare.”
Imidlalo yeHorsepower Off – Season Tournament iqaliswe nguTshabangu sekusiyaphela iminyaka yama 1990s njalo ibidlalwa ngabadlali ngesikhathi sekhefu leKhisimusi.
Kuthe ngokuhamba kwesikhathi amaqembu adlala kusigaba saphezulu aqala ukuvimbela abadlali ukuba bephatheke kiyo ngoba kuthiwa bazalimala.
UTshabangu uthi vele yena injongo yakhe ngeyokupha abadlali abangazakaliyo ithuba lokuba babonakale.
“Kuke kwaba lenkinga sibili. Mina owami umngane umuyi uErnerst Maphepha wayeyi meneja yeqembu leHighlanders njalo ngelinye ilanga kwathi aboDazzy, oMqwayi laboZenzo befuna ukudlala kodwa yena esala. Abafana labo baqina ngokuthi balambile bona bafuna ukudlala.
Sakuzwa sibili khonokho kodwa thina vele eyethu injongo ngeyokuthi labo abangazakaliyo babonakale. Asimaleli kodwa oyabe edlala kuzinga laphezulu oyabe efuna ukuzidlalela.”
Ngensuku uqala umncintiswano lo wawungenwa langabadlali abadlala phetsheya kolwandle bedlala ndawonye labanye abakhule labo emalokitshini abakhulele kuwo. Uqhubekele phambili ulokhu udlalwa ngemva kokuba abadlali abadlala kusigaba sePremier Soccer League bengasavunyelwa ngamaqembu abo kodwa bekungasafani. Ngesikhathi esadlala uTshabangu uke wadlalela amaqembu abalisa eleContex, Gweru United, Rhodal kanye leMeikles.
“IContex yayikuDivision 4. Ikhiwa langibuza ukuba kungani ithimu yami ingani iyaxegaxega ngaphendula ngathi asilabadlali. Yikho ukuthatha kwami uErnerst Maphepha, sasingambizi Maphepha ngalesosikhathi ngoba kwakulomunye umfana okwakuthiwa nguSimon uMaphepha esasihlala sigaba sinye laye, ngamthatha loRichard Ndlovu.
“Ikhiwa lafika lathi kanti yindaba abantu bakho bebalutshwana ngasengigijima ngaya eNguboyenja ngathatha uTitus Majola, oDala, oToastao baze baba bahlanu. Yikho ukubakhona kweqembu leContex.”
UTshabangu utshiye ukudlala ngemva kokulimala edlalela iqembu leMeikles kusigaba seSouth Zone ngo1978.Ngemva kwalokho ube ngunompembe waphinda njalo waphatheka ekuqoqeni imidlalo yesocial soccer.
Ucine ebumba eyakhe iligi eyeBulawayo Companies Social Soccer League.