BULAWAYO - Ingene kuviki yetshumi lanye imidlalo yenguqu eyesibanga eseCastle Lager Premier Soccer League lapho iqembu le Bulawayo Chiefs elaziwa ngokuthi Amakhosi libe ngutshiki lobhanqa 1 ka 1 lele Cranborne Bullets emdlalweni obusenkundleni yeLuveve, koBulawayo.
Umqeqetshi weqembu le Bulawayo Chiefs uLizwe Sweswe uveze ukusuthiseka ngalimpumela ekupheleni komdlalo.
“Kudlaliwe sibili, besidlala labantu abadlalayo njalo akumangalisi impumela abakade beyithola emidlalweni yabo eyedluleyo. Mina ngikholelwa ukuba nxa loba sisiba ngutshiki lobhanqa sibe sihlohlile ngoba lokho kutsho ukuba ngiyabe ngilakho lapho engizaqalalela khona ekusebenzeni kwami ngisiyaphambili,” kutsho uSweswe.
Umqeqetshi weqembu leCranborne Bullets uNesbert Saruchera laye uthe uyathokoza loba bethole umklomelo owodwa namhla.
“Besidlala singekho ngekhaya njalo siyathokoza ngokuthola umklomelo owodwa. Sesingakhala ngokukhutha esikwenze ukuhlohla amanye amathuba esiwatholileyo kodwa kuyabe kungekho kuhle ukuba sichothoze abafana ngoba kuyatholakala vele emdlalweni wenguqu,” kutsho uSaruchera.
Iqembu leCranborne Bullets yilo eliqale ukuhlohla ngehlandla lakuqala lomdlalo njalo lihlohlelwe nguErick Manokore kwathi eleChiefs lilinganise ngehlandla lesibili lomdlalo njalo lihlohlelwe ngoObriel Chirinda.
Eminye imidlalo edlalwe NgoMgqibelo, esigabeni eseCastle Lager Premier Soccer League iphele kanje:
Iqembu leFC Platinum linqobe eleBlack Rhinos nge 1 ka nya ngaseNational Sports Stadium kuthi eleYadah lalo linqobe eleManica Diamonds nge 1 ka nya ngaseGibbo.
NgeSonto imidlalo iyaqhubekela phambili njalo amaqembu azadlala ngokulandelayo.
Iqembu leCaps United lizemukela eleSimba Bhora ngaseNational Sports Stadium, iqembu leTriangle lizadlala leleSheasham ngaseGibbo, iqembu leHighlanders lizadibana leleGreen Fuel ngaseBarbourfields kuthi iqembu leNgezi Platinum lizadibana leleDynamos ngaseBaobab.
Your browser doesn’t support HTML5
Ezemidlalo siloJoseph Njanji