BULAWAYO - Iqembu labesilisa elimela ilizwe leZimbabwe emdlalweni kakhilikithi linqotshwe ngama wickets ayithoba munwe munye ngeleSri Lanka ngeSonto emdlalweni wokudinga amaqembu azakuyaphatheka kumncintiswano wezizwe zomhlaba ozaqhutshelwa kwele India ekupheleni komnyaka.
Iqembu leZimbabwe sekumele linqobe eleScotland ukuze lithole ilungelo elokuba ngelinye lamazwe azakuyaphatheka kumncintiswano wokudinga intshantshu zomhlaba jikelele ngemva kwempumela yanamhlanje etshiye abalandeli bomdlalo kakhilikithi bethithibele. Ekhuluma ekupheleni komdlalo lo, oqhutshelwe enkundleni yeQueens Sports Club koBulawayo, umqeqetshi weqembu leZimbabwe uDave Houghton uthe ithemba lisasekhona elokuba iqembu leZimbabwe liyedlala kwele India ekupheleni komnyaka.
“Sidlale kuhle kulumncintiswano njalo singene kumdlalo wanamhlanje sobabili leqembu leSri Lanka singazake sinqotshwe okutsho ukuba bekuvele kukhona iqembu elizasuka lidanile njalo kubeyithi. Akukho buhlungu kakhulu ukunqotshwa lokhu ngoba sisazi ukuba nxa singanqoba ngoLwesibili sizasala sisesimeni esihle kakhulu.”
UHoughton uqhubekele phambili wathi ukudliwa abakwenziwe namuhla sekungamanzi achithekileyo angeke abe esabutheka kodwa abasoze belahle imbeleko ngokufelwa.
“Okwenzakale namhla akusikho esizahlangana lakho ngoLwesibili ngoba iqembu leScotland lidlala ngendlela eyehlukeneyo njalo okuqakathekileyo yikuba thina sidlale ngokuzithemba.”
Umdlali onguye odlale indima enkulu ekuphathiseni iqembu leSri Lanka ukuba linqobe uMaheesh Theekshana utshayele ihlombe abalandeli bomdlalo kakhilikithi ngokuya ngobunengi enkundleni yeQueens Sports Club.
“Kuhle kakhulu kulizwe leZimbabwe ukudlala umncintiswano onje kulezibukeli ezinengi kangaka. Yinto esiyijwayeleyo leyi lakithi ukuba enkundleni kube Labantu abanengi ababukeleyo okuyinto eyenze ukuba singethuki ngitsho lakancane.”
Sikhangele umdlalo wenguqu: Nansi impumela yemidlalo yenguqu edlalwe namuhla kumncintiswano weCastle Lager Premier Soccer League.
Iqembu leHighlanders linqobe eleCaps United nge 2 ka 1 emdlalweni obusenkundleni yeBarbourfields, iqembu leBlack Rhinos linqotshwe nge 2 ka 1 ngeleDynamos ngase Bata, iqembu leTriangle litshaye eleCranborne Bullets nge 2 ka 1 eGibbo Stadium kuthi eleHerentals libhuqe eleSimba Bhora nge 2 ka 1 ngaseMandava.
SEE ALSO:
Udaba Esilwethulelwe NguJoseph Njanji