Omunye wabafundi beUniversity of Zimbabwe abayisithupha asebedlulise inyanga bevalelwe esitokisini uNkosazana Gamuchirai Chaburumba ukhululwe ngumthethwandaba weHigh Court izolo ngemali yesibambiso, i-bail, ezinkulungwane ezingamakhulu amabili, ZW$200,000.
Abafundi laba betheswa icala lokungcolisa imiduli yezakhiwo ezigoqela ezikahulumende eHarare ngokuyibhala-bhala ngesikhathi betshengisela phezu kokubotshwa kwesiphathamandla seCCC uMnu Job Sikhala.
Abanye abafundi abalokhe bevalelwe njalo bencitshwa i-bail babalisa uEmmanuel Sitima, Comfort Mpofu, Lionel Andrew Madamombe, Tawanda Benjamin Watadza loDarlington Upenyu Chigwena. Isiphathamandla senhlanganiso emela abafundi bamakolitshi eyeZINASU uMnu Benon Ncube utshele uNtungamili Nkomo weStudio 7 ukuthi lanxa bekujabulela ukukhululwa kukaGamuchirai, bafuna abanye bakhe labo bakhululwe.
Your browser doesn’t support HTML5
Ingxoxo lo Benon Ncube.