BULAWAYO - Umdlali wakwele Zimbabwe uSean Williams nguye okhethwe ukuba ngumdlali odlale okwedlula abanye ekupheleni komncintiswano weICC Cricket World Cup Qualifier ofike komlindi uyacina namhla esigodlweni iHarare.
UWilliams ukhethwe ukuba nguye odlale okwedlula abanye bonke loba nje iqembu leZimbabwe lingaphumelelanga ukuba ngelinye lamaqembu azakuyaphatheka kumncintiswano wokudinga intshantshu zomhlaba jikelele ozaqhutshelwa kweleIndia ekupheleni komnyaka.
Okwenze uWilliams athole isicoco sokuba ngumdlali owedlule abanye yikuba ubuthelele ama runs angamakhulu ayisithupha (600) waphinda wathatha amawickets amathathu kulumncintiswano wona ofike emaphethelweni namhla.
Iqembu leSri Lanka yilo elibe zintshantshu ngemva kokunqoba eleNetherlands nge 128 runs njalo womabili lawa maqembu yiwo athole ilungelo elokuyadlala kweleIndia.
Sikhangele ukuba imidlalo yenguqu eyesigaba seCastle Lager Premier Soccer League edlalwe namhla iphele njani;
Iqembu leHighlanders linqobe eleTriangle nge 1 ka nya enkundleni yeBarbourfields, iqembu le Hwange linqobe eleZPC Kariba nge 2 ka 1 ngaseColliery, iqembu leSheasham libe ngutshiki lobhanqa 0 ka 0 leleNgezi Platinum ngaseBata, iqembu leGreen Fuel libe ngutshiki lobhanqa 1 ka 1 leleChicken Inn ngaseGibbo, kuthi ngaseBaobab iqembu leSimba Bhora libe ngutshiki lobhanqa 0 ka 0 leleManica Diamonds.
Limpumela itshiye iqembu leHighlanders sekuyilo elihlezi phezu kwengalane yemiklomelo lilemiklomelo engamatshumi amabili lathoba minwe mbili.
SEE ALSO:
Udaba Esilwethulelwe nguJoseph Njanji