Ibandla le CCC lithi akumangalisi ukuxexebuka kwamalunga ebandla le MDC-T esiya kubandla le Zanu PF.
Kodwa umkhokheli webandla le MDC-T, uMnu. Douglas Mwonzora uthe yena labanye bakhe abalokhe besebandleni leli abasoze baye kubandla le Zanu PF.
UMwonzora wethese icala amalunga ebandla lakhe asexexebukile umlandu wokufumbathiswa yiZanu PF.
Umskeli wesikhulumeli sebandla le CCC, uMnu. Felix Magalela Mafa Sibanda utshele iStudio Seven ukuthi bavele bakubona ukuthi lelibandla lilobudlelwano le Zanu PF ngesikhathi baze basiwe emthethwandaba lapho abathathelwa impahla yonke ebalisa izakhiwo lezimota yaphiwa uMnu. Mwonzora lebandla lakhe.
UMnu. Felix Magalela Mafa sibanda ngumskeli wesikhulumeli sebandla le CCC.
Ubekhuluma ecingweni le Studio Seven ekoBulawayo.
Njengoba iStudio Seven ingasekeli hlangothi siphinde saxoxa lomnu. Witness Dube yena othi kunengi okwabangela ukuthi aye kubandla le Zanu PF.
Uthi wabona ukuthi lelibandla seligukuile alisela budlwangu dlwangu njalo lilenhlelo ezihle ukuthuthukisa impilo kazulu.