Taboka Ncube
Amagqwetha amabili uMnumzana Doug Coltart loMnumzana Tapiwa Muchineripi ababotshwe ngoMvulo esetheswa icala lokuphazamisa amapholisa ukuqhuba umsebenzi wawo, amiswe emthethwandaba ngoLwesibili, akhululwa ngemva kokuhlawula isibambiso sebail samadola eMelika alikhulu.
Amagqwetha la athi abotshwe ezama ukubonisa amapholisa ukuthi amalunga awe CCC, uMnu. Womberaiishe Nhende, owakhethwa ukuba ngukhansila emzini owe Glen Norah kuWard 27, eHarare, loMnu Sonele Mukhuhlani bakusimo esibi sempilakahle ngakho bebengenelisi ukukhuluma lamapholisa.
AbeCCC laba, babikwa bethunjwe ngoMgqibelo mhlaka 2 Mpandula banyamalala, bahlukunyezwa ngokutshaywa, bazobonakala eguswini duzane leHarare.
Ekhuluma ngaloludaba igqwetha elimela amalungelo oluntu, uNkosikazi Beatrice Mtetwa, uthe akula cala elidaliweyo.
“Akula cala la, yi-abuse nje leyi eye criminal justice system. Okumangalisayo yikuthi kwenzakala kusanda kugcotshwa ubukhokheli obutsha. Amapholisa athe efika akhuluma labantu besibhedlela abona lawo vele ukuthi abantu laba bebengenelisi ukukhuluma. Omunye ubelele omunye ekhanya vele ukuthi akenelisi ukukhuluma izinto ezihlanganayo."