Abemitshova ethwalela eGodini kanye labaphila ngokuthengisela kulindawo batshelwe ukuba kumele basuke ukuze abakhayo baqale umsebenzi mhlaka 1 Mbimbitho.
Ukhansili wako Bulawayo wanikeza inkampani yeTerracota umsebenzi wokwakha indawo yamavinkili eye eGodini Mall lapho okuzabe kugadelwa amabhasi lemitshova. Umsebenzi wokwakhiwa lapha kumele uqala mhlaka 1 Mbimbitho njalo bazisa abathengisayo kanye labemitshova ukuthi basuke endaweni le ukuze umsebenzi wokwakha usungule.
Egodini Mall
Laloba kunjalo abaphila ngokuthengisa bemelwe yinhlanganiso yabo eye Bulawayo Upcoming Traders Association (BUTA) bathi bafuna ukunikezwa inyanga ezithathu ukuthi basuke eGodini.
Umeli wenhlanganiso le Umnumzana Dumisani Ncube uthi indawo okumele bayekuzo azikalungiswa njalo kumele banikwezwe inyanga ezintathu, ethi bavela khulumisana labaphathi bekhansili becela ukuthi banikezwe isikhathi.
Unkosikazi Sekai Ndlovu othengisela eGodini uthi bezwa ubuhlungu behanjiswa kwenye indawo abesabela ukunikezwa indawo engelabantu njengeGodini. Uthe eGodini kufana lefekithali lapho abasebenza khona beziphilisa kunye lemuli zabo.
Osakhulayo umnumzana Ndodana Sibanda uthi eGodini kubasiza ukuthi bathole ingcosana abaziphilisa ngayo ethi ukususwa lapha uzakwenza bahlale kuphela baswele ukusebenza.
Umhlangano wabathengisela eGodini koBulawayo
Obona ngokuqoqwa kwenhlelo zeBUTA unkosikazi Nonhlanhla Hlabangana osebenzela egodini uthi ukuthuthukiswa kweGodini uyakwamukela kodwa ukhathazwa yikungahleleki kwendlela eqhutshwa ngayo. Ethi bayala ukuvuka bengekho mhlaka 1 Mbimbitho ngakho bafuna isikhathi esaneleyo esokuthi baziqooqe.Umnumzana Vincent Donga omunye walabo abamela abathengisayo uthi bavumelane lekhansili ukuthi abangeke basuke bengaphiwanga inyanga zintathu. Uthe njalo bazaqhubekela phambili behlangana lekhansili ngoMvulo ukuze kuqediswe isivumelwano lesi.
Umhlangano wabathengisela eGodini koBulawayo
Abantu abathengisa eGodini bangaphezu kwenkulungwane ezintathu. Isikhulumi sekhansili yako Bulawayo sethula umbiko welanga eliqondileyo lokuthi basuke eGodini ekuqaleni kwenyanga kaNhlolanja. IStudio 7 yehlulekile ukuxoxisana lekhansili ukuthi iphe imbono yayo ngalolu daba.
Ukwakhiwa kweGodini mall kuzabiza izigidi ezingamatshumi ayisithupha zamadola njalo ihlandla lakuqala lalumsebenzi likhangelelwe ukuthatha inyanga ezilitshumi lanhlanu.
Your browser doesn’t support HTML5
Udaba lwabathengisela EGodini Mall siluphiwa nguBathabile Masuku