Abamabandla ezombusazwe aphikisayo kanye labenhlanganiso ezisebenzelana lozulu, bayalisola inyathelo likahulumende weZanu PF, lokunikeza izitanda mahlayana kubontanga abakubandla leli, kungalandelwa mthetho, njalo kusobala ukuba yingendlela nje yokudinga ukuvhotelwa ngoba kusenzakala ngesikhathi kulungiselelwa ukhetho luka2018.
Le yimibono evezwe emhlanganweni owenzelwe eMedia Centre ngoLwesibili, wokuhlaziya inyathela likamphathintambo wezombuso yezabelo, umnumzana Saviour Kasukuwere, lokwabela ontanga izitanda emadolobheni abalisa elako Bulawayo, eHarare. Mutare lamanye.
Obona ngezombuso yezabelo ebandleni leMDC-T, umnumzana Eddie Cross uthi akumangalisi lokhu okwenziwayo, njengoba kuyindlela yakhe luhulumende weZanu PF, ukusebenzisa yiloba yiliphi iqhinga, ukubambelela embusweni.
Umahluko uCross, ethi yikuba, khathesi limizamo iqondiswe kwabasemadolobheni ngemva kokuba isikhathi esedlule amaqhinga manye esetshenziswe kwabasemaphandleni ngokwabelwa amasimu phansi kohlelo lokwabiwa kutsha kwamapulazi.
Umqondisi we Chitungwiza Residents Trust ( CHITREST ),umnumzana Mavelous Khumalo, uthi osokusenzakala lokhu, sekuyimvama selokhu abebandla le MDC T, lasungulwayo ngomnyaka ka 1999.
Ngomnyaka ka 2000, uKhumalo ethi kulapho abalwa impi yenkululeko banikezwa khona amasimu, kwaphathisa iZanu PF ekuthini balikhankasele ngandlela zonke.
Okwakhathesi, la maqhinga eseqondiswe kubontanga, ngoba bungasebuhle ubudlelwano phakathi komkhekheli weZanu Pf labalwa impi yenkululeko laba.
Ukhuthaza uzulu uKhumalo, ukuba angaze alalisa inkophe, avuleke amehlo, angaze avuma ukudlelezelwa yinkokheli yalelibandla, njengalokho osekusenziwa nguKasukuwere ukunikeza ontanga indawo zokwakha imizi yabo bona bengelayo lemali yokwakha lezo zindlu. Ethi ngelinye lamaqhinga njengamanye, ukubamba abantu amahleo, ukuba balivhotele.
Abezombusazwe lenhlanganiso ezisebenzelana lozulu, bayavumelana ukuba lokho osekusenziwa nguKasukuwere, kuphambana lomthetho, njengoba sokuyikuthathela omanisipala Amandla okwabela lawo mastand.
Your browser doesn’t support HTML5
Udaba lwamastands aphiwa abasakhulayo ngumpathintambo wembuso yezabelo uKasukuwere