Inengi labantu emzini weBudiriro 5, eHarare, kalizihluphanga ukuya edolobheni ukuyaqhuba imisebenzi yabo labaqhatshiweyo, njengendlela yokulalela inkuthazo yokuvala yonke ndawo emkhankasweni okhokhelwe zinhlanganiso ezizimeleyo enkundleni zebulenjini wokutshengisa ukuthukuthela kukazulu ngokonakala okulokhe kuqhubeka kwesimo somnotho lezombusazwe eZimbabwe.
Amapholisa emzini weBudiriro 5, abephendukisa labo abakade befuna ukugada imitshova ukuya edolobheni, atshaya abekade ephikisana lawo.
Ebenyakazela ndawana yonke amapholisa ohlangothi lwe Riot, emzini lo, engafuni kubona ababili loba abathathu bemi loba bezihambela.
Abemitshova labo bebetshiya abantu endleleni, abatshayeli besesaba ukubulawelwa izimota njengoba obekade ebonakala ethwele abantu besiya edolobheni, ubethwaliswa gadalala, ebulewelwe amafasitele.
Omunye wabangayanga emsebenzini ngumnumzana Nkosi Dube yena othi uyakujabulela lokho okwenziwe nguzulu.
Kwasekelwa ngokhokhela inhlanganiso yezifundi zemakolitshini ye Zimbabwe Student Union ( ZINASU ), ummumzana Alistair Pfunye. UPfunye uthi kunje kulezifundi ezibotshiweyo, zibekwa umlandu wokuphatheka kulokhu kutshengisela kusuku kwangoLwesithathu.
Akayanga emsebenzini umnumzana Joel Sibanda wasemzini we Budiriro 5, ethi ngoba esabele ukungena engozini yokutshaywa ngamapholisa kanye lokuba kuyindlela yokutshengisela kwakhe njengabanye, ekhonona laye phezu kwesimo elizweni.
Ababalisi bebengekho ezikolo kwabangela ukuba izifundi ziphindele emakhaya.
Lanxa bekunganeno emzini we Budiriro One, lokhe enyakazela amapholisa, exwayisa abantu ukuba bahlale emizini yabo.
Isikhulumeli samapholisa uSenior Assistant Commissioner Charity Charamba utshele umhlangano lentathelizindaba, ukuba kubotshwe abalitshumi lasitshiyagalo lunye-19, abayisithupha babo kungabemzini weBudiriro 5.