Odokothela bakweleMelika benhlanganiso eye Operation of Hope basesibhedlela SeMpilo Central Hospital koBulawayo kuliviki lapho abakhangelelwe ukuhlinza abantu abangamatshumi amabili abalendebe kumbe isilakala esidabukileyo, kuhlelo abaluqhuba minyaka yonke eZimbabwe.
Esibhedlela seMpilo Central koBulawayo
UMqondisi we OOH, uDokotela Jennifer Mora, uthi kulequla labodokotela labongi abeMelika labakwamanye amazwe azelabo ukuzoqhuba lumsebenzi abawuqala eZimbabwe ngomnyaka ka2006 eHarare. Lonyaka bayaqala ukuqhuba lumsebenzi koBulawayo ngoba bananzelela ukuba abantu bahamba umango omude ukuzonhlinzwa eHarare.
UMatron Ndlovu. wesibhedlela seMpilo Central
UMatron Sibusisiwe faith Ndlovu isikhulumi sesibhedlela seMpilo Central Hospital uthi izolo bahlole abantu abangamatshumi eyisikhombisa kodwa phakathi kwabo abangamatshumi amabili yibo abazahlinzwa ngoba abezempilakahle abeOOH bezaqhuba lumsebenzi okwensuku ezinhlanu kuphela koBulawayo.
UMatron Ndlovu ubike ukuba bona esibhedlela abahlinzi ndebe kunye lezilakalaka ezidabukileyo njalo lusebenzi ulendleko enkulu ekhama abanengi ukudinga usizo lokwelatshwa kulesi simo.
Omunye wabantwana abasuke eTsholotsho ukuzohlinzwa
UNkosikazi Sibongile Ncube osuka koSipepa eTsholotsho uthi umzukulu wakhe uNkosithandile Ngwenya owazalwa elendebe lesilakalaka esidabukileyo ubemelele ukuhlinzwa lamhlanje ngoba isimo akuso senza ehluleke ukudla lokukhuluma.
Kuthi uNkosikazi Silethubuhle Mkandla osuka elokishini leNketa KoBulawayo indodana yakhe uAndiswa Nyoni, elenyanga ezilitshumi izelwe layo iyahlinzwa.
Omunye wabantwana abahlinziweyo uAndiswa Nyoni elonina
Kuthi uNkosikazi Opah Chikofa oweMagwegwe koBulawayo olengane ebivela hlinzwa uSipho Mushanyiri oleminyaka elitshumi lasithupha ubejabula okwamagama ethi laba bantu akazi ukuthi bamvelele ngaphi ngoba ubengasoze afa enelisa indleko yokuthi ingane yakhe inhlinzwe.
Ingcwethi zezempilakanhle zenhlanganiso yeOOH zilenhlelo emazweni abalisa iZambia, Malawi lamanye aseAsia zigxile ekuhlinzeni indebe lezilakalaka kuphela njalo zizinikela ukwenza lumsebenzi kungelambadalo, zizihlawulela indleko yokusuka emazweni azo okubiza inkulungwane ezedlula amatshumi amahlanu amadollar-$50,000 kuhlangene lemithi.
Odokothela abeOperation of Hope
UDokotela Mora uchaze ukuba phakathi kwabantwana abangamakhulu ayisificamunwe mibili lamatshumi amahlanu abazalwa eZimbabwe ngelanga oyedwa uzalwa elendebe kumbe isilakalaka esidabukileyo.
Ubike ukuba ukubalendebe kumbe isilakalaka esidabukileyo kwenza umnwana akhule nzima njalo adlenzima. Abalesilakalaka esidabukileyo balakho ukudla nzima ukudla kuphuma ngamakhala okucina kubangela eminye imikhuhlane lokuhitshwa yikudla.
UDokotela Mora ubike ukuba ngesikhathi behlinza abantu bayafundisa njalo odokotela labongi beZimbabwe okuyiyo injongo kayise uDokotela Joseph Clawson owaqala lihlanganiso.
Uhulumende weZimbabwe encedisana lenkampani yeSchweppes leRotary Club bayancedisa kuloluhlelo lokuhlinza indebe lesilakalaka.
Your browser doesn’t support HTML5
Udaba lwabe Operation of Hope siluphiwa nguNompumelelo Moyo