AbeZimbabwe abahlala eSouth Africa sebelwamukele ngenjabulo uhlelo lokufafaza imithi emitshoveni ngemva kokwesabela ukuthi inengi labo eligada limitshova lilakho ukuthelelana igciwane lecoronavirus.
Uhulumende weSouth Africa usesungule uhlelo lokuthi imitshova yonke ithelwe umuthi abantu bengakangeni iphinde njalo nxa sebephumile.
Kuloluhlelo izihambi zizaphiwa imithi yokugcoba izandla ebulala igciwane lecoronavirus.
Uhulumende uthi loluhlelo luzaqheliswa lungene lasemabhasini kanye lezitimeleni.
Ugatsha lwezempilakahle luthi lukhangelele ukuthi ingxenye yabantu bakweleSouth Africa babanjwe ligciwane lecoronavirus.
Isiphathamandla sikahulumende uNkosikazi Ayanda Allie Paine uthi bafuna ukuvala zonke indlela zonke zokumemetheka kwaleli gciwane.
Inani labantu asebelegcikwane leCoronavirus kweleSouth Africa selisedlula amakhulu amabili.
Lokhu sokubangele ukwesaba kakhulu kuzizalwane zeZimbabwe ikakhulu lezo ezihamba ngemitshova malanga wonke. Imitshova yakweleSouth Africa ithwala abantu abedlula izigidi ezilitshumi lesithupha (16 million) ngelanga elizweni.
Lelinani ligoqela izinkulungwane zezizalwane zeZimbabwe eziyabe zisiya emisebenzini kumbe ezikolo.
Your browser doesn’t support HTML5
UBenedict Nhlapho Usethulela Loludaba