Amapholisa ogatsha lwezomvikela olwe Melika, olwe Federal Bureau of Investigations (FBI), ngoMvulo angene emahofisini egqwetha likaMongameli Donald Trump bathatha ingwalo lencwadi eziphathelane lokubhadalwa kwesivala mlomo sikantombazana ophila ngokuthatha imifanekiso yezecansi othiwa wangena emacansini loTrump phambilini kokhetho nyakenye.
Amapholisa la enze lokhu ngemva kokuphiwa imvumo ngumthethwandaba obucelwe ligqwetha elicwayisisa ngodaba lokuthi uTrump wancediswa yini nguhulumende wakwele Russia ukuthi anqobe kukhetho lwanyakenye.
UTrump usole kakhulu ukungena emahofisini lendlini yegqwetha lakhe, uMnu. Michael D Cohen, esithi bamotsha isikhathi bemdinga ubuthakathi.
UCohen uthi wabhadala uNkosazana Stormy Daniels isivala mlomo yena uTrump engazi.
UCohen uthi wenza lokhu njengendlela yokuthi loludaba lungazaphazamisa uTrump emkhankasweni wakhe hatshi ukuthi ulecala alidalayo.
Ukuhlaziya loludaba sixoxe lesizalwane seZimbabwe esihlala ngapha kwele Melika, uMnu. Muzi Ncube, othe, “Okwenzala ngapha kwele Melika kutshengisa ukuthi akulamuntu ophezu komthetho laloba yena uMongameli Trump.”
Your browser doesn’t support HTML5
Ingxoxo loMnu. Muzi Ncube