Isimithathu imidlalo ilandelana lilokhu lidliwa iqembu lenguqu ele Highlanders ngemva kokunqotshwa 2-1liqembu leTriangle.
Iqembu le Highlanders alikenelisi ukunqoba selokhu liqale ihlandla lesibili elemidlalo yesigaba se Castle Premier Soccer League njengoba ngempelaviki edluleyo litshaywe 2-1 ngele Triangle.
Limpumela iza ngemva kokuba iqembu le Bosso litshaywe nge 1 ka nya ngele Caps United emdlalweni weviki yetshumi lesithupha eHarare, kwathi kolandele lapho lanqotshwa 2 ka 1 ngele Mutare City lidlala lisenkundleni yeBarbourfields koBulawayo.
Ukunqotshwa kweBosso ngele Triangle kutsho ukuba selitshiywa ngemiklomelo emihlanu liqembu elihlezi phezu kwalo engalaneni ele Caps United lona elikundawo yesibili njalo lilemiklomelo engamatshumi amathathu lesithupha.
Iqembu le Caps United libe ngutshiki lobhanqa 0-0 leqembu elihlezi phezu kwengalane ele FC Platinum okutsho ukuba abafana baka Norman Mapeza balokhu bekhokhela ngemiklomelo emibili phezu kwengalane bele 38 points.
Iqembu le Dynamos liyale lilokhu lihlezi endaweni yesine lilemiklomelo engamatshumi amabili lesikhombisa loba nje litshaywe nge 2 ka 1 liqembu le Border Strikers.
Kundawo yesihlanu kuleqembu le Triangle lalo elilemiklomelo engamatshumi amabili lesikhombisa kuthi ngemva kwalo endaweni yesithupha kuleqembu le Ngezi Platinum elilemiklomelo engamatshumi amabili lesithupha.
Iqembu le ZPC Kariba likundawo yesikhombisa lilemiklomelo engamatshumi amabili lanhlanu kuthi ngemva kwalo kulamaqembu amabili alemiklomelo engamatshumi amabili lane abalisa ele How Mine lele Bulawayo City.
Abafana be How Mine batshaye iHarare City nge 1 ka nya ngeSonto ikanti iqembu le Bulawayo City libe ngutshiki lobhanqa 0-0 lele Hwange ngoMgqibelo.
Ukaputeni weqembu le Bulawayo City uXolisani Moyo uthi bazame konke okusemandleni abo kodwa kwehlula ukuba belitshayele emambuleni.
“Thina konke ebesikuhlelile sikwenzile sehluleke nje ukuhlohla kodwa engithanda ukukutsho yikuba emdlalweni wethu olandelayo esizawudlala eHarare sizaphenduka sijimbile,” kutsho uMoyo.
Kundawo yetshumi kuleqembu le Chicken Inn lona elilemiklomelo engamatshumi amabili lantathu okulinani eliphethwe ngamaqembu abalisa ele Harare City, ele Chapungu kanye lele Hwange.
Iqembu le Mutare City lihlezi endaweni yesithathu usuka ngaphansi kwengalane lilemiklomelo elitshumi lesithupha kuthi ngaphansi kwalo kuleqembu le Tsholotsho elilemiklomelo elitshumi lantathu.
Lawa maqembu adibene ngeSonto umdlalo waphela zingutshiki lobhanqa 3 ka 3.
Iqembu le Border Strikers lisemsileni wengalane lilemiklomelo elitshumi.
Sikhangele okwenzakala kumidlalo yeOlympics eqhutshelwa elizweni le Brazil kulezinsuku.
Iqembu labesifazane elimela ilizwe emdlalweni wenguqu aliselalo ithuba lokudlulela phambili emkhankasweni wokuthola imendulo njengoba linqotshwe kumidlalo emibili eseliyidlale kusibaya sika Group F.
Ama Mighty Warriors atshaywe 6 – 1 liqembu le Germany emdlalweni walo wakuqala kwathi kowesibili linqotshwe nge 3 ka 1 liqembu le Canada.
Emdlalweni walo wesithathu iqembu leli lizadlala lele Australia libe selibhekisa amabombo ekhaya.
Intshantshu yomdlalo wokubhukutsha uKirsty Coventry akaphumelelanga ukungena ku final eyomjaho we 100m backstroke ngemva kokuba ephutshe ekundawo yesithupha ku semi – final yesibili.
NgoLwesine uCoventry uzaphatheka kumjaho we 200m backstroke.
Umdlali womdlalo we rowing uMicheen Thornycroft ufinyelele kusigaba se quarter – final esomncintiswano we singles sculls kucele labesifazane njalo uzagwedla njalo kusasa ngoLwesibili kusigaba esilandelayo salumncintiswano.
Your browser doesn’t support HTML5
Udaba Silwethulelwa nguJoseph Njanji