Izizalwane zeZimbabwe kweleSouth Africa sezincome ugatsha lwendaba zasekhaya ngokwengeza isikhathi sohlelo lokunikezwa kwamapermit eZSP alokhu engakaphumi. Sebencome njalo uhulumende ngokukhangelisisa izinkulungwane zezicelo abezaliwe inengi lazo esezibuye zemukelwa.
Embikweni owethulwe ngumphathintambo wogatsha lwendaba zasekhaya, umnumnzana Malusi Gigaba ngoLwesithathu, uhlelo lokunikezwa kwamapermit abelokhu engakaphumi luzaqhubeka kuze kuye phela inyanga kaZibandlela ngomnyaka ozayo.
Lolugatsha luthi njalo phakathi kwabafaka izicelo zamapermit abaphose bafike izinkulungwane ezingamakhulu amabili (197,950) izicelo eziyi (197, 790) zemukelwe. Kulezicelo eziphansi kwamakhulu amabili kuphela (160) ezilokhu zisakhangelisiswa.
Phakathi kwezicelo zonke ezemukelweyo, sekusele amapermit edlulanje kancane izinkulungwane ezilitshumi (11,499) angakathathwa ngabanikazi.
Umgcinisihlalo wenhlanganiso yeZimbabwe Community in South Africa umnumnzana Ngqabutho Mabhena uthi batshayela ihlombe ugatsha lwendaba zasekhaya.
Njengoba inkampani yeVFS ebiphiwe umsebenzi wokunikeza amapermit la isivalile amahofini amancane abesenza lo umsebenzi, abalokhu bengakathathi amapermit abo bakhuthazwa ukuthi baye emahofisini amakhulu ale inkampani asemadolobheni etshiyeneyo.
Ezinye indaba ezimnandi ngezokuthi izicelo zamapermit ezizinkulungwane ezilitshumi lambili (12000) abezaliwe, sezikhangelisisiwe zonke zemukelwa kwaliwa kuphela ezingamatshumi amabili lanhlanu (25).
Kusenjalo umnumnzana Mabhena uthi kusalohlupho olukhulu lwabazali asebesehluleka ukufaka abantwababo kumapermit. Uthi loba kunjalo ingqobe sezikulabo abathole amapermit la ukuthi basebenze gadalala njengoba ezavalwa ukusebenza ngo Mpalakazi ka 2017, sekukhangelelwe ukuthi abanini bawo baphindele ekhaya.
Your browser doesn’t support HTML5
Udaba lwesikhathi esesengeziwe sokucela imvumo yokuhlala kweleSouth Africa