EleZimbabwe limanyane lozulu wonke emhlabeni ukunanza usuku oluqakathekisa imisebenzi yababalisi bona abathi sebephila nzima bengabayanga njalo befundisa abantwana abangelakudla okwenelyo lempahla zokusebenzisa, ngenxa yokoma komnotho welizwe.
Inhlanganiso elwela amalungelo ababalisi abafundisa emaphandleni ye Amagalmated Rural Teachers Union of Zimbabwe – ARTUZ ithi isimo sababalisi elizweni sizwisa usizi ngoba.
Umkhokheli walinhlanganiso uMnumzana Obert Masaraure uthi abangakuthakazelela njengenhlanganiso yikuzimisela kwababalisi elizweni ukuqhuba umsebenzi wabo wokuthuthukisa ezemfundo lanxa isimo sisibi, ikakhulu emaphandleni.
Lokhu kusekelwe yinhlanganiso ye Zimbabwe Teachers Union – ZIMTA yona ethi ababalisi sebesehluleka ukuphila impilo elesithunzi ngenxa yokuwa komnotho welizwe.
Unobhala jikelele walinhlanganiso uMnu. Tapson Nganunu Sibanda uthi inhlanganiso yakhe ikhuthaza uhulumende ukuthi alungise isimo somnotho welizwe kuseselesikhathi.
Usuku lokuqakathekisa imisebenzi yababalisi lunanzwa iminyaka yonke mhla ka 5 Mfumfu. Lwasungulwa luhlangothi olubona ngezokuthuthukiswa kwezemfundo lezifundo se science emhlabeni wonke i UNESCO ngomnyaka ka 1994, ngaphansi kwenhlanganiso yomanyano wamazwe omhlaba eye United Nations.
Lonyaka usuku lolu lunanzwa phansi kwendikimba ethi “Young Teachers: The future of the Proffession.”