Abasakhulayo sebesole amazwi kaNkosikazi Grace Mugabe okuthi abesifazana abadlwengulwa begqoke izigcebhezana akumelanga bekhale ngoba bayabe bezokhele amalahle ngokungagqoki kuhle.
UNkosikazi Mugabe wethule amazwi la emhlanganweni awenze ngempelaviki.
Abasakhulayo bathi amazwi anje akhuthaza ukudlwengulwa kwabesifazana, okuludubo oluqhubeka lusabalala elizweni.
Ontanga basole njalo amazwi kaNkosikazi Mugabe okuthi uMongameli Mugabe uzabusa aze afikise iminyaka elikhulu.
Olwela ilungelo labesifazana uNkosikazi Nqobile Munzara uthi amazwi kaNkosikazi Mugabe abisela muva imizamo yokulwisana lodubo lokudlwengulwa kwabesifazana.
"Amazwi anje kalunganga ngoba ukuthi umfazi agqokeni yinto amele azikhethele yena," kutsho uNkosikazi Munzara.
Your browser doesn’t support HTML5
Ingxoxo loNkosikazi Nqobile Munzara