Kambe yiliphi iqembu elizaphakamisa inkezo ye Castle Premier Soccer League lonyaka?
Lo ngumbuzo ozacaca ngosuku lokucina olwemidlalo yalinkezo ngemva kokuba imidlalo yangempelaviki itshiye iqembu le Caps United lele FC Platinum kuyiwo womabili alokhe elethuba lokuba zintshantshu zalonyaka.
Iqembu le Caps United lihlezi phezu kwengalane lilemiklomelo engamatshumi ayisithupha kuthi ele FC Platinum lihlezi endaweni yesibili lilemiklomelo engamatshumi amahlanu lathoba minwe mbili.
Abafana beMakepekepe batshaye abe Ngezi Platinum nge 1 ka nya ngeSonto kwathi ngosuku olufanayo ele FC Platinum libhaxabule ele Highlanders nge 3 ka nya.
Ngaphansi kwengalane amaqembu athi ele Tsholotsho lele Mutare City aqhubekela phambili elwisa ukuqeda esendaweni yesithathu nxa usuka ngaphansi kwengalane ukuze engagunyulwa kusigaba saphezulu loba nje inhlanganiso ye Premier Soccer League isiqume ukuba ayisoze igumule amaqembu lonyaka ngenxa yengxabangxoza edalwe yinhlanganiso ye Zifa ensukwini ezedluleyo.
Imidlalo yalonyaka iqale kusazakala ukuba lonyaka kuyagunyulwa amaqembu amabili ekupheleni kwesizini kodwa inhlanganiso ye Zifa ensukwini ezedluleyo iqume ukuba kuzagunyulwa amaqembu amane.
Ukungezwani phakathi kwenhlanganiso lezi sokudale ukuba kumiswe inkokheli ezigoqela uNdumiso Gumede lo Peter Dube abe Highlanders kanye lo Twine Phiri lo Lewis Uriri abeqembu le Caps United ekuphathekeni kwezomdlalo wenguqu njalo inhlanganiso ye PSL ithi izakusa loludaba kumthethwandaba othonisa ezemidlalo owe Court of Sports Arbitration.
Emsileni wengalane kuleqembu le Border Strikers, phezu kwe Border Strikers kuleqembu le Mutare City Rovers yona ehlezi ngaphansi kwe Tsholotsho.
Your browser doesn’t support HTML5
Udaba Esilethulelwe NguJoseph Njanji
Zombili iTsholotsho le Mutare City Rovers zilemiklomelo engamatshumi amabili lesithupha njalo umqeqetshi weqembu le Tsholotsho uLizwe Sweswe uthi ulethemba lokuba iqembu lakhe lizaqeda liphezu kwele Mutare City Rovers.
“Kwesinye isikhathi abafana laba bayadlala kakhulu nxa bedlala lamaqembu amakhulu. Umdlalo wethu owokucina ulakho ukuba lesandla ekutheni ngobani intshantshu zanyakenye njalo iyahlupha imidlalo enjalo kodwa abafana bami labo bazabe bekwazi ukuba badlalela impilo zabo kusigaba saphezulu yikho lumdlalo kumele ubenze basined ekugunyulweni.”
Iqembu le Tsholotsho lizadlala eligijimisa isicoco ele FC Platinum emdlalweni walo owokucina ngoMgqibelo njalo imidlalo eyosuku lokucina kusigaba se Castle Premier Soccer League izadlalwa kusukela ngoLwesihlanu lapho okulemidlalo emibili kuthi eminye yonke izadlalwa ngoMgqibelo.
KWEZEKHILIKITHI
Umdlalo obuphakathi kweqembu le Zimbabwe lele Sri Lanka obusenkundleni ye Queens Sports Club ngoMvulo kawusafikanga emaphethelweni ngemva kokuba kune izulu elikhulu edolobheni lako Bulawayo okudale ukuba umdlalo umiswe sekudlalwe ama overs edlula itshumi lantathu.
Womabili lawa maqembu aphiwe imiklomelo emibili okutsho ukuba iqembu le Zimbabwe selilemiklomelo emine njengoba lithole eminye njalo imiklomelo emibili ngemva kokuba ngutshiki lobhanqa lele West Indies ngoMgqibelo.
Iqembu le West Indies lele Sri Lanka alemiklomelo eyisikhombisa ngalinye.
Imidlalo iqhubekela phambili ngoLwesithathu lapho iqembu le Sri Lanka elizadibana khona lele West Indies kuthi ngoLwesihlanu iqembu le Zimbabwe lizadlala lele West Indies.
Umdlalo wokudinga intshantshu phakathi kwamazwe la womathathu uzakuba khona ngeSonto njalo uzadlalwa ngamaqembu amabili azabe elemiklomelo eminengi ngemva komdlalo wangoLwesihlanu.