Umkhokheli webandla leMDC uMnu. Nelson Chamisa uthi uyakhathazeka ngokubhidlika kwenhlelo zempilakahle kanye lezokwabiwa kokudla elizweni ngenxa kahulumende athi kakhethwanga ngabantu.
Embikweni owethulwe yisikhulumeli sakhe uMnu. Nkululeko Sibanda ngoLwesithathu, uMnu. Chamisa uthi ubonga amanye amazwe ngokuphathisa eleZimbabwe ngoba abantu bengafa ngenxa yendlala, ikakhulu emaphandleni nxa bengatholanga usizo. Usole iziphathamandla zikahulumende athi zabela abantu ukudla kusiya ngokuthi basekela liphi ibandla. Ukhuthaze amazwe la ukuthi afake imigoqo evimbela inkohlakalo ekwabeni ukudla.
UMnu. Chamisa utshayele ihlombe izizalwane zeZimbabwe ezihlala kwamanye amazwe, agoqela eleSouth Africa, Zambia, Angola, USA, UK, Australia, Candada, Japan, India, umanyano weUnited Nations, lenhlanganiso ezizimeleyo ngokuncedisa eleZimbabwe.
Ukuhlaziya loludaba, siqale ngokubuza uMnu. Sibanda ukuthi njengoba abanye bekhangelele ukuthi ibandla leMDC lilethe inguquko, umbiko lo uzaphathisa kulokhu na?
Your browser doesn’t support HTML5
Ingxoxo loMnu. Nkululeko Sibanda
Umongameli Emmerson Mnangagwa uhlezi egcizelela ukuthi unxusa wonke amabandla aphikisayo kumanyano wePOLAD ukuthi axoxisane laye ngokuhluphayo elizweni ngendlela yokukulungisisa, kodwa ibandla leMDC lithi lifuna ukukhulumisana laye lizimele lodwa.