Ihofisi kaMongameli Emmerson Mnangagwa ithi kungamanga ukuthi imuli yakhe iphatheke kumisebenzi emibi kundaba zokwenjiwa kwamatshe aligugu.
Isikhulumeli sikaMnangagwa uMnu George Charamba wethule umbiko izolo esola iphephandaba leNewsDay lamanye adinda ebulenjini kuphela esithi akhuluma amanga ngemuli kaMongameli ngenjongo yokuyingcolisa.
UCharamba ulandule udaba olwethulwe yiNewsDay izolo obelusithi umntakaMnangagwa uTarirai David Mnangagwa wetheswa icala lokuhluthunela omunye umgodi wegolide eGweru.
UMnu Charamba uthe uTarirai kayisiyo ndodana kaMnangagwa. Ngokunjalo uthe iphephandaba leli kumele lixolise kumbe liveze ubufakazi bokuthi umsolwa yindodana kaMongameli Mnangagwa.
Uthe amaphephandaba amanengi akhanya elenjongo yokungcolisa lemuli kaMnangagwa ngokuqamba amanga esithi ilesandla kumacala avelela kugatsha lwamatshe aligugu.
Kumaviki edluleyo uhulumende ulandule njalo ukuthi imuli kaMnangagwa ilobudlelwano loHenrietta Rushwaya ngemva kokuba omunye owabotshelwa igolidi elatholakala kuRushwaya ethe lelogolide lalingelikaNkosikazi Mnangagwa lendodana yakhe uCollins.
Ukuhlaziya loludaba sixoxe lohlaziya ezombusazwe uMnu Effie Dlela Ncube yena othe nxa uMnangagwa engakhohlakalanga, kumele azisuse ebantwini abakhohlakeleyo abaduzane laye.
Your browser doesn’t support HTML5
Ingxoxo loMnu Effie Dlela Ncube
Asenelisanga ukukhuma labephephandaba leNewsDay.