Idale leHouse of Representatives kwele Melika lithatha isinqumo sokuthi uMongameli Donald Trump wethula umbiko wokubandlulula abanye abantu kulandela ukulwisana kwakhe lamalunga edale leCongress akubandla lama Democrats.
Lokhu kwenzakale edale leHouse of Representatives izolo ntambama kulandela umbiko owethulwe nguNkosikazi Nancy Pelosi, umkhokheli wedale leli, oveze ukuthi uTrump uthuke ngedlela elenkethabetshabi amalunga edale leCongress abalisa uIlhan Omar, uAlexandria Ocasio-Cortez, uAyana Pressley loRashida Tlaib.
UTrump uthi abane laba bazonda ilizwe leIsrael njalo basekela amalwecatsha aweAl Qaeda lokunye okungahambelani labantu beMelika. Ugcizelele esithi nxa bengathakazeleli akwenzayo kwele Melika kumele babuyele emazweni abo loba nje abathathu bezalwa eMelika kuthi-ke uOmar wabuya elizweni leli esesengumntwana.
Kulamalunga amane akubandla lama Republicans asekele isinqumo esithethwe lidale leHouse of Representatives. Amalunga amanengi ebandla lama Republicans kawavotelanga isinqumo lesi.
UNkosikazi Pelosi ukubeke sobala kungakavotwa ukuthi uTrump wethule umbiko olenkethabetshabi.
“Kubi kakhulu okwethulwe yiWhite House. Kuyayangisa kakhulu. Umbiko lo ulenkethabetshabi. Kuyamangalisa ukuthi uTrump uqhubekela phambili ezama ukuzivikela.”
Uphinde wathi akumelanga amazwi kaTrump akhulunywe kwele Melika.
“Akulandawo okumele kukhulunywe okwethulwe ngumongameli. Kwehlukanisa abantu njalo kulakho ukubaxabanisa. Kwenza ukuthi kuzondwe abantu abatsha kwele Melika labantu abamnyama labanye.”
Kodwa-ke abamele ibandla lama Republicans abanjengo Mnu. Kevin McCarthy bathi kuyayangisa okwenziwe libandla lama Democrats elephule imithetho lisenzela ukuthatha isinqumo sokuchothoza amazwi kaTrump.
“Namuhla lusuku oludanisayo edale leli. Kwephulwe yonke imithetho namuhla. Idale leli livotele ukwephulwa kwemithetho lapha.”
Amalunga ebandla lama Democrats athethiswe nguTrump athi ukhuluma konke lokhu ngoba uselungiselela ukhetho oluzakwenziwa ngomnyaka ozayo. Ukuze sihlaziye udaba lolu, sixoxe loMnu. Thabang Nare, ingcwethi kwezombusazwe, othi akumangalisi okukhulunywa nguTrump.
UTrump utshele intathelizindaba ngoLwesithathu ukuthi bangenza abakufunayo abane laba athe kumele basuke kwele Melika nxa bengathakazeleli akwenzayo.
Your browser doesn’t support HTML5
Udaba Esilethulelwe NguGibbs Dube