UMongameli Emmerson Mnangagwa uthi uzakwethulela ilizwe ugwalo olumumethe okwafunyanwa yikhomishini ekhokhelwa nguMnu. Kgalema Motlanthe eyayidingisia ngodlakela olwaqhamuka ngemva kokhetho olwedluleyo, lapho okwadutshulwa kwatshona abantu abayisithupha, kwalimala abanye.
Ukhulume la amazwi emhlanganweni omkhulu weConference yebandla leZANU PF osaqhubeka eEsigodini eMatabeleland South lapho okuthe gwaqa amalunga alelibandla edlula inkulungwane ezinhlanu.
Umongameli Mnangagwa ukhuthaze abatsha kubandla lakhe ukuthi bephatheke enkundleni zokuxoxisana ebulenjini bevikele inhlelo zeZANU PF nxa abanye bezichothoza kulezondawo.
Uphinde wathi labo abafuna ukuthi ilizwe lidatshulwe phakathi bayazikhohlisa ngoba eZimbabwe kuvele kulemihlobo etshiyeneyo yabantu okufanele ihlale ndawonye.
Abanye abaphathintambo bakahulumende bachasisele lumhlangano inhlelo abaziqhubayo kungatsha zabo, ezokuthuthukisa umnotho welizwe.
Ekhuluma emhlanganweni ofanayo, omunye wabasekeli bakamongameli uMnu. Constantino Chiwenga ugcizelele ukuthi umongameli Mnangagwa nguye ozancintisa kukhetho ngomnyaka ka 2023 ngoba kufanele aqedise amahlandla akhe amabili okubusa.
Kodwa ingcwethi ecubungula ezombusazwe, uMnu. Dumisani Nkomo uthi amazwi kaMnu. Chiwenga awakhombi ukuthi ibandla leli libambene.
Your browser doesn’t support HTML5
Ingxoxo loMnu. Dumisani Nkomo