Abasakhulayo ngoLwesithathu baphawule umkhankaso wokufinyelela ontanga ilizwe lonke jikelele kungakhathalekile ukuba bakuliphi ibandla owe #LeaveNoYouthBehind2018 Campaign.
Lumkhankaso uhlose ukutholisa abasakhulayo ulwazi phezu kokuqakatheka kokuphatheka enhlelweni zokuthuthukisa ilizwe okugoqela ukuphatheka kukhetho.
Emkhosini wokuphawula lumkhankaso ngokusemthethweni, owenzelwe eCresta Oasis Hotel, abameli babasakhulayo laba abavela ezigabeni zonke zelizwe, bathe awubandlululi muntu lumkhankaso.
UNkosazana Thando Gwinji, ngosakhulayo oyisiphathamandla senhlanganiso ye Youth For Innovation Trust koBulawayo. Ungomunye njalo wabakukhomidi ebona ngezokuhanjiswa kwenhlelo kulomkhankaso we #LeaveNoYouthBehind2018 Campaign edolobheni lelo.
UGwinji uthe umkhankaso lo uzoqondiswa kuye wonke osakhulayo ilizwe lonke jikelele ngesikhathi kulungiselelwa ukhetho oluzakwenziwa ngomnyaka ozayo.
UNkosazana Sichasisile Ndlovu, isiphathamandla senhlanganiso ye Community Youth Development Trust emela ontanga eGwanda, esigabeni seMatebeleland South, uthe akekho ozotshiywa ngaphandle kumkhankaso lo.
Lokhu kusekelwe nguFidelis Chima owenhlanganiso ye Hwange Youth Human Rights Forum esigabeni se Matebeleland North, ongomunye njalo wabakukhomidi ebona ngezokuhlelwa kwenhlelo kulomkhankaso we #LeaveNoYouthBehind2018 Campaign.
Abasakhulayo laba bathi inhloso yabo ngeyokufinyelela ontanga abangaba yizigidi ezimbili kungakayiwa kukhetho luka 2018.
Your browser doesn’t support HTML5
Udaba Esilethulwe nguMavis Gama