Inhlanganiso ekhankasela ukulondolozwa kwamalungelo oluntu emhlabeni jikelele, iHuman Rights Watch (HRW), ithi idabukile ngokufa komqondisi wayo ezansi yeAfrica uMnu Dewa Mavhinga, yena otshone ngoMgqibelo.
UMavhinga ubikwa edliwe ngumkhuhlane weCovid-19 ekweleSouth Africa.
Kumbiko awethule izolo, umkhokheli weHRW uMnu Kenneth Roth uthe uMavhinga ubengumlweli wamalungelo oluntu oqotho njalo osebenze gadalala ekuvikeleni lawamalungelo hatshi eZimbabwe kuphela kodwa ezansi yezwekazi leAfrica jikelele.
UMavhinga, yena obeligqwetha, ubesaziwa ngokuveza ukwephulwa kwamalungelo oluntu nguhulumende weZanu PF lokuphathisa abahlukuluzwayo.
Ukubhubha kwakhe kudanise abanengi abalwela amalungelo labezombusazwe abagoqela abebandla leMDC Alliance, kutsho umsekeli wesikhulumeli salelibandla uMnu Felix Magalela Mafa Sibanda.
Your browser doesn’t support HTML5
Ingxoxo loMnu Felix Magalela Mafa Sibanda
Obona ngokwethulwa kwemibiko kubandla leZanu PF uMnu Tafadzwa Mugwadi yena utshele iStudio 7 ukuthi labo bayawukhalela umndeni kaMavhinga lanxa bebengavumelani laye kwezombusazwe.