Inhlanganiso yeLaw Sociaety of Zimbabwe (LSZ) ithi isilobele umphathintambo wezemithetho uMnu Ziyambi Ziyambi incwadi imxwayisa ukuthi kumele ayiphe ubufakazi bamazwi akhe okuthi imithethwandaba yeZimbabwe isetshenziswa yizitha zaphandle.
UZiyambi ukhulume amazwi la ethukuthele phezu kwesinqumo esethulwe yiHigh Court ngoMgqibelo esokuthi uMongameli Emmerson Mnangagwa wephule umthetho ngokuqhelisa isikhathi sokusebenza kukaMnu Luke Malaba, yena osuswe yisinqumo lesi esikhundleni sikamahluli omkhulu welizwe uChief Justice.
Ngemva kokuchothozwa nguzulu, uhulumende wethule umbiko ngoLwesibili echasisa ukuthi uyayihlonipha imithethwandaba yelizwe ngokugcweleyo lanxa engavumelani lesinqumo seHigh Court.
UMnangagwa laye wethule umbiko ofanayo enkundleni yeTwitter esithi uhulumende wakhe uzayihlonipha imithethwandaba kanye lezinqumo zayo.
Wengeze wathi uzulu weZimbabwe jikelele kungakhathalekile ukuthi umuntu ungubani, kumele ayihloniphe imithethwandaba.
UMnangagwa uthe njalo bayakuhlonipha ukuthi izinkantolo zisebenza zizimele kungela kungenela kwabezombusazwe.
Lanxa kunjalo, umkhokheli weLaw Sociaety of Zimbabwe uMnu Wellington Magaya utshele iStudio 7 ukuthi bakhathazekile ngamazwi kaZiyambi, wona athi ahlambaza imithethwandaba.
Ingcwethi kwezombusazwe uDr Brilliant Mhlanga utshele iStudio 7 ukuthi amazwi kaMnangagwa ayize ngoba indlela uZiyambi aziphathe ngayo yiyo kanye indlela uhulumende kaMnangagwa aziphatha ngayo.
Your browser doesn’t support HTML5