Umanyano weZanu PF lamabandla aphikisayo amancane owePolad ufikise incwadi kudale lephalamende eMelika eleCongress ngoLwesibili usithi uhulumende walelolizwe kumele esule izijeziso azethesa amalunga eZanu PF ngoba ziphazamisa uzulu makhaza.
Incwadi le ibiqondiswe kukomidi ebona ngobudlelwano beMelika lamazwe eAfrica eyeU.S. House of Representatives Foreign Committee, yona eqhube umhlangano wokuhlaziya izijeziso iMelika eyazethesa amazwe eAfrica leziphathamandla zabohulumende abephula amalungelo oluntu.
Umgcinisihlalo walikomidi uNkosikazi Karen Bass uthe uhlezi esizwa izizalwane zeZimbabwe zikhala ngokuthi izijeziso lezi zilimaza uzulu jikelele hatshi labo abeZanu PF eziqondiswe kubo.
Omunye okuPolad uMnu Kwanele Hlabangana ongumkhokheli webandla leRepublican Party of Zimbabwe yena othi izijeziso lezi kumele zesulwe ngoba zilimaza umphakathi.
Your browser doesn’t support HTML5
Ingxoxo loMnu Kwanele Hlabangana
Ukuhlaziya loludaba sixoxe lengcwethi kwezombusazwe uMnu Effie Dlela Ncube yena othi izijeziso lezi azisoze zesulwe ngoba uhulumende weZanu PF eqhubeka ngokwephula amalungelo oluntu.
Your browser doesn’t support HTML5
Ingxoxo loMnu Effie Dlela Ncube