Iqembu lenguqu ele FC Platinum selikhokhela ngemiklomelo emihlanu engalaneni yemiklomelo ngemva kwemidlalo yangempelaviki kusigaba se Castle Premier Soccer League.
Iqembu lenguqu eleFC Platinum.
Iqembu le FC Platinum selilemiklomelo engamatshumi amane lambili ngemva kokunqoba elikwenze ele Triangle nge 2 ka 1 ngeSonto.
Kundawo yesibili kuleqembu le Caps United lona elilemiklomelo engamatshumi amathathu lesikhombisa njalo elitshaywe nge 3 ka 1 liqembu le Bulawayo City.
Ekhuluma ngemva kwalumdlalo ukaputeni weqembu le Bulawayo City uXolisani Moyo uthe ukunqoba kwabo kuzakwenza labo abadlali baleliqembu abangadlalanga ngempelaviki besebenze kanzima.
Iqembu le Highlanders lale lilokhu lihlezi endaweni yesithathu lilemiklomelo engamatshumi amathathu lambili loba nje linqotshwe nge 1 ka nya liqembu le ZPC Kariba ngoMgqibelo.
Iqembu le Bosso selidlale imidlalo eyisithupha lisehluleka ukunqoba njalo amathuba alo okuphakamisa isicoco seligi lonyaka asenciphile njengoba selitshiywa ngemiklomelo elitshumi liqembu le FC Platinum okuyilo elihlezi esiqongweni sengalane.
Iqembu lenguqu eleDynamos FC
Kundawo yesine kuleqembu le Dynamos lona elinqobe ele Harare City nge 1 ka nya njalo lilemiklomelo engamatshumi amathathu lanye okulinani elifana leleqembu le ZPC Kariba.
Iqembu le Triangle lihlezi kundawo yesithupha lilemiklomelo engamatshumi amathathu kuthi ngemva kwalo kutholakala iqembu le Bulawayo City elilemiklomelo engamatshumi amabili lathoba minwe mbili.
Iqembu elihlezi ngaphansi kwengalane ele Border Strikers linqobe ele Ngezi Platinum nge 2 ka nya okuyimpumela ekhuphule inani layo lemiklomelo laya kutshumi lantathu.
Iqembu elihlezi endaweni yesibili nxa usuka emsileni wengalane ele Tsholotsho lalo lilemiklomelo elitshumi lantathu njalo litshaywe nge 1 ka ngele Chicken Inn.
…………………………………
Imidlalo ye 2016 Rio Olympics ifike komlindi uyacina ngeSonto njalo ilizwe le Zimbabwe alenelisanga ukuthola imendulo ikanti ele United States of America yilo elithole imendulo ezinengi.
Abadlali belizwe le Melika babuthelele imendulo ezilikhulu lamatshumi amabili lanye (121) ezibalisa ezingamatshumi amane lesithupha ezegolide, ezingamatshumi amathathu lesikhombisa ezesiliva kanye lezingamatshumi amathathu lathoba minwe mbili ezombala wethusi.
Kusenjalo imidlalo yabatsha eye Zimbabwe National Youth Games layo ifike komlindi uyacina ngoMgqibelo edolobheni le Chinhoyi njalo isigaba se Masvingo yiso esiphutshe imidlalo sisendaweni yakuqala.
Isigaba se Harare siqede sisendaweni yesibili, eseMashonaland West okuyiso ebesiqoqe limidlalo siqede sisendaweni yesithathu, kundawo yesine kubelesigaba se Manicaland, abe Mashonaland West baqede bekundawo yesihlanu kuthi abako Bulawayo baqede bekundawo yesithupha.
Kundawo yesikhombisa kulesigaba se Matabeleland North kulandele isigaba se Mashonaland Central esibe kundawo yethoba minwe mbili ikanti iMatabeleland South iqede isendaweni yesibili nxa usuka emsileni kuthi isigaba se Midlands yiso esiqede sisemsileni.
Your browser doesn’t support HTML5
Ezemidlalo lilo Joseph Njanji