Isiphathamandla senhlanganiso ephathisa amazwe omhlaba ngokuwakweledisa imali eyeInternational Monetary Fund- IMF uMnu. Chileshe Mpundu Kapwepwe utshele intathelizindaba eHarare lamuhla ukuthi kufanele eleZimbabwe liguqule imithetho yokusebenza elizweni eyamaLabor laws, ukwenzela ukuthi amafekithali avulwe njalo kuvuselelwe umnotho welizwe.
Lokhu kwenzakala umphathintambo obona ngezemali uMnu. Patrick Chinamasa esithi uhulumende ulungiselela ukuhlangana leIMF, iWorld Bank, kanye leAfrican Development Bank ukuze bekhulumisane ngezikwelede ilizwe elilazo.
Inhlanganiso elwela amalungelo ezisebenzi eyeZimbabwe Congress of Trade Unions ithi izisebenzi ezedlula inkulungwane ezingamatshumi amabili lanhlanu sezalahlekelwa yimisebenzi kuwonalo umnyaka kuphela, ngemva kokuvalwa kwamankampani elizweni kubangelwa yikubhidlika komnotho welizwe.
Kodwa isiphathamandla seZCTU uMnu. George Nkiwane uthi inhlanganiso yakhe ayivumelani lombono we IMF ngoba imithetho ephathelane lezisebenzi eye Labor Laws ayisiyo eyimbangela yokuvalwa kwamafekithali.
Your browser doesn’t support HTML5
Ingxoxo LoMnu. George Nkiwane