Abasakhulayo beZimbabwe sebamukele ngenjabulo inkuthazo yokuthi abakhokheli bamazwe omhlaba kumele baqakathekise imfundo emazweni abo.
Inkuthazo le yethulwe nguNkosazana Malala Yousafzai, yena olwela amalungelo abantwana emhlanganweni weUNited Nations General Assembly kuliviki.
UMalala udabuka kwelePakistan njalo wasuka elizweni lakhe eminyakeni edluleyo ngemva kokudutshulwa ngabahlamuki besiTaliban bemethesa icala lokukhankasela ukuthi abantwana abangamankazana baye esikolo.
“Ngilethemba lokuthi amazwe omhlaba azamanyana emkhankasweni wokutholisa abantwana imfundo njalo kube lokuthula,” kutsho uYousafzai.
“Kumele sense umhlaba lo esiphila kuwo ube yindawo enhle; infundo lithemba, imfundo yikuthula.”
Amazwi kaYousafzai agcizelelwe ngosakhulayo weZimbabwe uNtando Dumani.
“Indaba yemfundo le yindaba eqakatheke kakhulu ngenxa yokuthi abantu abathe bathola imfundo baba ngabantu abakhululekileyo,” kutsho uDumani.
Your browser doesn’t support HTML5
Ingxoxo loMnu Ntando Dumani