Imidlalo yesigaba se Castle Premier Soccer League ingena kuviki yesikhombisa kulimpelaviki njalo intathelizindaba yethu yezemidlalo uJoseph Njanji usipha ukuba amaqembu azadlala njani.
Iqembu lenguqu eleFC Platinum
NgoMgqibelo kulemidlalo emine njalo enkundleni yeMandava iqembu elihlezi phezu kwengalane ele FC Platinum lizadibana leqembu elihlezi emsileni wengalane ele Border Strikers, iqembu le Chapungu lizemukela ele Ngezi Platinum Stars enkundleni ye Ascot kuthi enkundleni yeRufaro iqembu le Caps United lizangqikilana leqembu le ZPC Kariba ikanti iqembu le Tsholotsho lizemukela iqembu le Dynamos enkundleni ye Barbourfields.
Iqembu lenguqu eleDynamos FC
Iqembu le Dynamos lihlezi kundawo engejwayelekanga engalaneni yemiklomelo njengoba likundawo yesibili nxa usuka ngaphansi kwengalane njalo lize lehlukana lomqeqetshi uPaulo Silva ngemva kokuba lisehluleka ukunqoba.
ULloyd Mutasa nguye oseqeqetsha iqembu le Dynamos njalo umdlalo wakusasa uyabe ungowesibili kunguye ozibambe esidukwini.
Iqembu lenguqu eleHighlanders Bosso
NgeSonto iqembu le Highlanders lizemukela ele Harare City enkundleni yeBarbourfields njalo umqeqetshi weBosso uErol Akbay uthi abafana bakhe kumele befunde ukungayekethisi umdlalo uze ufike komlindi uyacina.
Kweminye imidlalo ezadlalwa ngeSonto iqembu le Mutare City Rovers lizemukela iqembu le Chicken Inn enkundleni yeSakubva.
Umqeqetshi omutsha weChicken Inn uRahman Gumbo
Lo kuyabe kungumdlalo wakuqala abafana beChicken Inn beqeqetshwa nguRahman Gumbo yena othethe isikhundla sika Joey Antipas osesiya sebenzela iqembu le AmaZulu ele South Africa.
Iqembu le Triangle lizadibana leqembu le Bulawayo City enkundleni ye Gibbo kuthi iqembu le Hwange lizemukela ele How Mine enkundleni ye Colliery.
Kunjalo nje, abezemidlalo bathe gwaqa edolobheni lako Bulawayo lapho abazoxazulula khona isimo sezemidlalo elizweni.
Loluhlelo luqale ngoLwesihlanu esikolo semfundo yaphezulu ese Bulawayo Polytechnic njalo luzagqitshwa ngeSonto.
Umphathintambo wogatsha lwezemidlalo lokuzilibazisa uMakhosini Hlongwane ukhangelelwe ukuvula loluhlelo okusemthwethweni kusasa ngoMgqibelo.
Umpathintambo wezemidlalo uMnu. Makhosini Hlongwane
Kuzakuba lezikhulumi ezehlukeneyo ezizakupha imbono yazo ngesimo sezemidlalo kanye lamasu okuthuthukisa lolugatsha.
Your browser doesn’t support HTML5
Ezemidlalo lilo Joseph Njanji