Imidlalo yeCastle Premier Soccer League ingena kuviki yetshumi kulimpelaviki kulemidlalo eyisikhombisa azadlalwa enkundleni ezitshiyeneyo zakwele Zimbabwe.
NgoMgqibelo iqembu le Ngezi Platinum lidibane lele Tsholotsho enkundleni ye Nyamhunga kuthi enkundleni yeBarbourfields kwadibana iqembu le Bulawayo City lele Harare City.
Umdlalo obekumele ube phakathi kweqembu le Chicken Inn lele FC Platinum udluliselwe phambili ngoba iqembu le Chicken Inn lilabadlali abadlula abathathu abayingxenye yeqembu lesizwe ebeliphatheka kumncintiswano weCosafa oqhutshelwa kwele Namibia.
NgeSonto iqembu le Dynamos lidibane lele Ngezi Platinum enkundleni yeRufaro kuthi ele How Mine lingqikilana lele Highlanders enkundleni ye Barbourfields.
Omunye wabaqeqetshi beqembu leHighlanders uCosmas Zulu
Omunye wabaqeqetshi beqembu leHighlanders uCosmas Zulu ukhuthaze abalandeli beBosso ukuba basekele abadlali ukuze babe ledlabuzane.
Asingeke sidlale siyi Highlanders kungela ama supporters, yibo abanikazi bethimu. Singekela ukuthabisa ama supporters sizathabisa obani? Siyabadinga abalandeli bethimu.
Kweminye imidlalo ezadlalwa ngeSonto iqembu le Border Strikers lizemukela ele Chapungu enkundleni ye Dulivhadzimu njalo lokhu kuyabe kungokwakuqala ukuba abafana beBorder Strikers besebenzise linkundla selokhu bengene kusigaba saphezulu ekuqaleni komnyaka.
Iqembu le Triangle lizatshayana lele Hwange enkundleni ye Gibbo kuthi iqembu le Mutare City Rovers lizemukela ele Caps United enkundleni ye Sakubva.
………………………………
Sikhangele umdlalo werugby.
Umkhokheli wenhlanganiso ye Zimbabwe Rugby Union uMnumzana Nyararai Sibanda
Umkhokheli wenhlanganiso ye Zimbabwe Rugby Union uMnumzana Nyararai Sibanda uthi linhlanganiso izaqhubekela phambili ngenhlelo ebeziqoqwa ngumuyi uLameck Kasuka yena odlule emhlabeni ngeSonto edluleyo njalo ongcwatshwe ngoLwesine koBulawayo.
Isidumbu sika Lameck Kasuka sithwelwe nguThemba Phiri, Brian Arendse,lo Slatter Ndlovu
UKasuka uhlale esibhedlela okweminyaka engamatshumi amabili lesithupha ngemva kokulimala umhlane ngesikhathi iqembu le Highlanders Rugby Club lizilolonga ngomnyaka ka 1990.
Owadlala lo Kasuka kuqembu le Highlanders Rugby Club uThemba Phiri uthi umuyi ngomunye wabantu abadlala indima enkulu ekutheni umdlalo werugby umemetheke udlalwe emalokitshini ahlala abanengi.
Owadlala loKasuka uThemba Phiri
Kwakulenhlanganiso ezazisiphathisa ukuba sihambe sifundisa umdlalo werugby ezikolo ezisemalokitshini ahlala abantu abanengi njalo uLameck wayengomunye wabantu ababekhokhela ekutheni lumdlalo udlalwe kuyo yonke indawo.
USibanda uthi loba uKasuka ebengumuntu ongasenelisi ukuma loba ehambe ngezakhe inyawo, uyale elokhu ephatheka ekuthuthukisweni komdlalo werugby njalo inhlanganiso ye Zimbabwe Rugby Union izaqhubekisela phambili imisebenzi yakhe.
Izinto ebezisenziwa nguKasuka yizinto ezokuthi ubefisa ukuba eqhubekisele phambili umdlalo werugby yikho ngimele inhlanganiso yeZimbabwe Rugby Union siyakhala ngokulahlekelwa ngumuntu obethuthukisa umdlalo werugby njalo siyathembisa ukuba ezakhe inhlelo zizaqhubekela phambili zithola usekelo lwethu.
UKasuka ungcwatshwe emathuneni eLady Stanley okuyindawo okubekwa khona abantu abayabe benze imisebenzi eyokuthuthukisa impilo lenhlalakahle yabahlali bedolobho lako Bulawayo.