MPOI: Banengi Abaswela Ukudla eMatabeleland leMidlands

WASHINGTON —  Inhlanganiso ye Mass Public Opinion Institute ithi inani labantu abaswela ukudla elizweni, ikakhulu ezigabeni zeMatabeleland le Midlands liqongile kakhulu.

Isiphathamandla esibona ngokudingisisa kulinhlanganiso, uMnu. Stephen Ndoma utshele iStudio 7 ukuthi eMatabeleland North abantu abathi baswela ukudla bangaba yisilinganiso sokumatshumi athoba munwemunye lanye ekhulwini- 91%, eMatabeleland South bayisilinganiso sokungamatshumi athoba minwe mbii lane ekhulwini-84%, e Midlands bayisilinganiso sokungamatshumi athobaminwe mbili lantathu ekhulwini- 83%.

Uthe isigaba se Mashonaland West le Manicaland silabantu abangaba yisilinganiso sokungamatshumi amahlanu lanhlanu ekhulwini- 55% lamatshumi amahlanu lantathu ekhulwini-53% ngokulandelana kwazo abakusimo esifanayo, kukanti eHarare balutshwana abathi baswela ukudla nxa beqathaniswa lezinye izigaba ngoba beyisilinganiso sokungamatshumi amathathu lasithupha ekhulwini-36% kuphela.

UMnu. Ndoma ugcizelele ukuthi inengi labantu elizweni alifinyeleli amanzi ahlanzekileyo, amagetsi, ezimpilakahle, kanye lemali emabhanga.

UMnu. Effie Dlela-Ncube, ingcwethi ecubungula ezombusazwe, njalo engumgcinisihlalo wenhlanganiso yeNational Association of Non-Governmental Organizations utshele uSithandekile Mhlanga weStudio 7 ukuthi umbiko we Mass Public Opinion Institute uveza iqiniso ngokwenzakala elizweni.

Ingxoxo LoMnu. Effie Dlela-Ncube