Inani lasebefunyenwe beleCovid 19, eZimbabwe, selikunkulungwane ezedlula eziyisithupha-6,070. Labulala abedlula ikhulu lengxenye-155, kwasinda abazinkulungwane phose ezinhlanu-4,950.
Inhlanganiso yomanyano wamazwe womhlaba eyeWorld Health Organization, ithi amazwe awezwekazi leAfrica alakho ukuthi avule izikolo, lanxa umhlaba usalwisana leCOVID-19. IZimbabwe yahle yathi izikolo zivulwa ngoLwezi.
Uhulumende uthi lanxa esenza konke okusemandleni akhe ukuba atholakale amabhasi athwala uzulu awenkampani yeZUPCO, ukhathazekile ngokwanda kwabantu abahamba mahlayana okwenza ibe nkulu ingozi yokuthelelana umkhuhlane weCOVID-19 emadolobheni.
Ukukhalala umsebenzi kwabongi sekuhlanganise phose inyanga ezintathu njalo uhulumende lokhe engakaphenduli izikhalazo zabo. Lokhu sekwenze isimo ezibhedlela zikahulumende sibesibi ngoba kusebenza abongi abalutshwana.
Umhlangano webandla elibusayo kweleMelika elamaRepublicans lisungule umhlangano walo omkhulu oweConvention izolo, kodwa usenzelwa ebulenjini ngenxa yokuba ilizwe liphakathi lokulwisana leCovid 19. Abakhulume izolo bagoqela indodana kaMongameli welizwe uMnu Donald Trump Junior loNkosikazi Kimberly Guilfoyle.
Ku Livetalk namhlanje kuhlelo lwabatsha olwe “The Connection” sikhangela ukuvulwa kwezikolo ngoLwezi osekubikwe nguhulumende weZimbabwe ukuze abaloba imihloliso lonyaka benelise ukwenza njalo.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318…
Abafisa ukulalalela kumsakazo we Studio7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.
Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.