Ekutshoneni kwelanga layizolo, inani lasebefunyenwe beleCovid 19, eZimbabwe beselisondela kwabangamakhulu amane-383 abagoqela abangamatshumi amahlanu lantathu-53 asebesinde kulesi sifo, sabulala abane.
Umongameli Emmerson Mnangagwa ukhokhele umbuthano ogoqela abafundisi benkolo ezehlukeneyo leziphathamandla zikahulumende wakhe wokuthandazela iZimbabwe lenelise ukungqoba udubo lokusabalala komkhuhlane we Covid-19.
Umthethwandaba kaMantshi eHarare walele imvumo yokuhlawula isibambiso eseBail abesifazana beMDC Alliance oNkosazana Joana Mamombe, Cecelia Chimbiri loNetsai Marova. Abathathu laba betheswa icala lokuqamba amanga ukuthi bathunjwe kanye lokuhlukunyezwa ngamapholisa.
Kwezemidlalo……. Uzulu ukhuthazwa ukuba engalibali abesifazane abadlala umdlalo wenguqu nxa ephathisa abezemidlalo abaqhuba nzima ngenxa yomkhuhlane we Covid - 19.
Ku Livetalk namhlanje sikhangela umthandazo owenziwe yilizwe ukhokhelwa nguMongameli Emmerson Mnangagwa ukuze inqotshwe impi yokulwisana leCovid 19.