Abogatsha lwezempilakahle babika ukuba ngokutshona kosuku lwayizolo kwabahlolwe iCovid 19 kutholakale abangamakhulu edlula ayisikhombisa-765, belegcikwane leli, labulala abangamatshumi amabili lanye-21.
Asebehlatshwe ijekiseni lakuqala lokuzivikela kuCovid 19 sebesedlula izigidi ezine-4,176,397. Kuthi asebehlatshwe amabili sebeyizigidi ezedlula ezintathu-3,197,072, kulabazinkulungwane ezedlula ezilitshumi lanhlanu-15,185, asebehlatshwe elesithathu.
Amapholisa eHarare namuhla atshaye njalo abopha amalunga enhlanganiso yababalisi bemaphandleni, iAmalgamated Rural Teachers Union of Zimbabwe (ARTUZ), ngesikhathi etshengisela emahofisini eNSSA esithi afuna uhulumende awengezelele iholo.
Amapholisa kweleBotswana athi kubotshwe abantu abaphose befike ikhulu, besetheswa umlandu wokuzama ukungena elizweni besebenzisa amaphepha empumela yokuhlolwa iCovid-19 awokuzikhandela.
AbeZimbabwe kweleSouth Africa bathi sebephilela evalweni lokuhlaselwa lokulahlekelwa yimisebenzi njengoba zisanda inkuthazo zokuthi bakhitshwe emisebenzini.
Kusigaba sezizalwane zeZimbabwe ezihlala kwamanye amazwe namuhla sixoxa loMnu. Nkomiyaphi Msipha, odabuka Emzola esigabeni seLupane eMatabeleland South, otshayela imota ezinkulu kwele Scotland.
Kusele kumi iqembu leHwange lele Arenel Movers kumncintiswano we Southern Region Division One Wafa Wafa tournament.
KuLivetalk namuhla kuhlelo “Diaspora Forum” sikhangela okwenziwa ngabadabuka eZimbabwe asebehlala kwamanye amazwe.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318. Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke. Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.