Inhlanganiso ephathisa uzulu ngokudla, iWorld Food Program, ithi isithole ingxenye kuphela yemali yokuphathisa eleZimbabwe.
Imbiko le iza ngesikhathi indlala isisidla ubhedu ngamandla, izifuyo lazo sezisifa ngendlala ikakhulu esigabeni seMatabeleland South lapho okufe khona inkomo ezingamakhulu amathathu ngenyanga edluleyo.
I-WFP ithi ibindinga imali engamadala ayizigidi ezingamatshumi amahlanu lasithupha, i$56 million, kodwa uhulumende wathi uzaphathisa ngamadola ayizigidi ezinhlanu.
Linhlanganiso ithi isithole ingxenye yemali le kuphela, i$25 million.
Abaphithiswa yilinhlanganiso baphiwa amadola ayithobamunwemunye imuli inye ngenyanga. Abantwana abanengi babikwa bengasayi esikolo kwezinye izigaba ngenxa yendlala.
Ingcwethi kwezokulima uMnu. Mandla Nkomo utshele iStudio 7 ukuthi intengo yenyama isehlile ngenxa yokuthi abalimi abanengi sebethengisa inkomo zabo besesabela ukuthi zizakufa ngendlala.
"Umumo esikuwo njengoba sake sawuxoxa kuleza insuku, sesiphakathi kweEl Nino, and iEl Nino ekwenzayo yikuthi izulu liyaphuza ukubuya and bakhangelele ukuthi lizabuya ngaboMarch, kunjalo amadlelo lamanzi enkomo aseqale ukuphela manje," kutsho uNkomo.
Wengeze wathi inani lenkomo esezifile elikhitshwayo liphansi kakhulu kulalelo alizwayo, esithi sekumele uhulumende aphathise abalimi ngamadlelo, imithi lokunye okungenza zingacubi.
UNkomo uthi okunye okuzenza umumo wezokudla umnyaka ozayo ube mubi yikuthi inengi lezakhamizi lisebenzisa inkomo ukulima kuzakuthi nxa izulu selisina lithole inkabi zingaselamandla okudonsa ikhuba.
"Kwezinye indawo, njengangapha emzansi Africa bathi inyama usuthathe uze ukholwe ngoba abanengi sebehlaba inkomo ukuze bazithengise zisaphila zingakacubi," kutsho uNkomo.
Your browser doesn’t support HTML5
Ingxoxo loMnu. Mandla Nkomo