Inkosi yamaNdebele ilakho ukugcotshwa kunyanga ezilutshwana ezilandelayo kulandela inkulumo lamalungiselelo aqala eminyakeni phose engamatshumi amabili adlulayo.
Loku kukhulunywe emkhosini wokukhumbula inkosi uMzilikazi owenzelwe eMhlahlandlela ngempelasonto.
Selokhu kwaqala umgubho wenkosi ngomnyaka ka 2000 akuzake kube lesiphathamandla sikahulumende esilesikhundla esaphezulu njengalokho okwenzakale lonyaka lapho kade kulomsekeli kamongameli, uMnu. Phelekezela Mphoko.
Emazwini akhe awethule kulumbuthano, uMphoko uthe kuqakathekile ukulondoloza amasiko.
"Londolozani amasiko ethu ngoba isizukulwane sizamele sibeyazi imbali yethu kusukela ekadeni," kutsho uMphoko.
UChris Gande weStudio Seven uxoxe lesizukulwane sikaMzilikazi, uMnu. Zwidekalanga Peter Khumalo othi uMphoko uze kulumbuthano hatshi njengomsekeli kaMongameli kodwa njengesakhamuzi esilelungelo lokubakhona emkhosini lo.
UKhumalo wengezelele esithi: "Ungakhohlwa njalo ukuthi bakhona emulini yakoMphoko abakhethwa ukuba yinduna."
UKhumalo uthi bakhangelele ukuthi kusiyaphela umnyaka ozayo kuyabe sekulenkosi yamaNdebele eZimbabwe.
Your browser doesn’t support HTML5
Ingxoxo loMnu. Zwidekalanga Peter Khumalo