Iziphathamandla zeZanu PF zithi azithandabuzi ukuthi ukhetho oluzayo luzaqhutshwa ngokukhululekileyo njengokufisa kukazulu weZimbabwe lamanye amazwe afana leMelika.
Kodwa ezinye ingcwethi kwezombusazwe zithi aziboni lokhu kusenzeka.
Idale lephalamende eMelika libe lomhlangano wokuhlaziya ezombusazwe eZimbabwe ngoLwesithathu amalunga alelidale akhuthaza uhulumende ukuthi eqhube ukhetho olukhululekileyo njalo ehloniphe amalungelo oluntu ukuze amazwe womabili edlelane kuhle.
Ekhuluma emhlanganweni lo, umgcinisihlalo wekomidi ebona ngobudlelwano beMelika lamazwe aseAfrica uMnu. Ed Royce uthe kumele uhulumende elwisane lenkohlakalo ayiqede, ehloniphe imithetho yelizwe njalo elondoloze amalungelo oluntu.
Kungenzeka lokhu, uCongressman Royce uthe eleMelika lilakho ukwesula izijeziso elazifakela iziphathamandla zikahulumende ezigoqela uMongameli Emmerson Mnangagwa ngokwakhe.
Amazwi akhe agcizelelwe ngabanye bakhe uCongressman Christopher Smith loCongresswoman Karen Bass.
Ukuhlaziya loludaba sixhume Ingcwethi kwezombusazwe uDr. Brilliant Mhlanga lesiphathamandla sebandla leZanu PF uMnu. Effort Nkomo onguye osungula lingxoxo.
Your browser doesn’t support HTML5
Ingxoxo Phakathi kukaMnu Effort Nkomo loDr Brilliant Mhlanga