Uhlangothi lukahulumende olubona ngokuthunyelwa kwemibiko olwePostal and Telecommunications Regulatory Authority of Zimbabwe (POTRAZ) luthi iZimbabwe kumele iqhube inhlelo zokupha abantu ulwazi ngokuvikelela abantwana ngesikhathi befinyelela inkundla zokuxhumana ku-internet.
Kugwalo olusanda kukhutshwa, uhlangothi lolu luthe kuqakathekile njalo ukuthi abantwana bathole ulwazi ku-internet ngendimi zabo ukuze baluzwisise kalula.
Ugwalo lolu luveza okuphume kucwaningo lokuvikeleka kwabantwana ku-internet oluqhutshwe yiPOTRAZ isebenzela ndawonye le Research Council of Zimbabwe.
Ucwaningo lolu lukhuthaze njalo ukuthi ukwengezwa kwenani labantwana ikakhulu abasemaphandleni abafinyelela i-internet kuqakathekiswe njalo ababalisi labazali abakulezindawo labo baphiwe ulwazi ngokusebenza kwenkundla zokuxhumana ebulenjini.
Uhulumende esebenza lohlangothi lolu useqhube inhlelo ezimbalwa ezokutholisa izifundi zemaphandleni i-internet kodwa izifundi ezinengi zilokhu zingakalitholi leli thuba.
UMnu Munyaradzi Masiiwa olwela amalungelo ababalisi bemaphandleni ekunhlanganiso yeArmalgamated Rural Teachers Union utshele uTaboka Ncube oweStudio7 ukuthi ababalisi bemaphandleni basasele emuva njengoba abanengi bengela magetsi kanye le-internet.
SEE ALSO: Ingxoxo loMnu Munyaradzi Masiiwa