Iqembu lenguqu ele Bulawayo City linqobe ele Talen Vision nge 1 ka nya emdlalweni obuphakathi kwamaqembu womabili, enkundleni yeLuveve koBulawayo ngoLwesihlanu emini.
Amaqembu la yiwo akhokhelayo engalaneni yemiklomelo, esigabeni se Southern Region Division One Soccer League ngakhoke alwisa ukungena esigabeni saphezulu ese Premier Soccer League ngomnyaka ozayo.
Abafana be Bulawayo City bona abakade bedlala kusigaba saphezulu nyakenye bathuthukise amathuba abo awokuphanga babuyele bayedlala kusigaba se Castle Lager Premier Soccer League ngokunqoba abakwenze ngoLwesihlanu ngoba impumela yomdlalo lo ibatshiye besalela ngemiklomelo emithathu kuphela liqembu elihlezi phezu kwengalane ele Talen Vision.
Bekungokwakuqala ukuba iqembu le Talen Vision linqotshwe kumidlalo yalonyaka njalo ohlohlele iqembu le Bulawayo City nguMelikhaya Moyo.
Iqembu le Talen Vision lihlezi phezu kwengalane lilemiklomelo engamatshumi amahlanu lambili ikanti ele Bulawayo City lihlezi endaweni yesibili lilemiklomelo engamatshumi amane lathoba munwe munye.
Phezu kwalokho iqembu le Talen Vision selidlale imidlalo engamatshumi amabili lantathu kuthi ele Bulawayo City selidlale engamatshumi amabili lambili kodwa umqeqetshi we Bulawayo City uTry Ncube uthi ukudlala imidlalo emilutshwane akubabeki esimeni esingcono kuleqembu le Talen Vision.
“Impumela leyi itsho ukuba umncintiswano uqhubekela phambili kodwa bona bavele baphambili ngoba lomdlalo lowu okumele siwudlale ukuze silingane lamanye amaqembu asikawudlali ikanti vele bona futhi bahlohle amagoli amanengu kulawethu.
Ngalokho ke okwakhathesi baphambili njalo umkhulu umsebenzi esilawo ngoba baqinile,” kutsho uNcube.
Iqembu le Talen Vision lidlale isikhathi eside lisilele ngomdlali oyedwa ngemva kokuba imvimbi uDouglas Sibanda etshengiswe ikhasi elombala obomvu.
Loba kunjalo umqeqetshi weqembu le Talen Vision uMkhuphali Masuku uthe kabasoze basebenzise lokho njengengcazelo eyokuba yikho benqotshiwe njalo kabasoze belahle imbeleko ngokufelwa.
“Yikho okwenza umncintiswano ubemnandi. Siyakujabulela ukuba oyabe enqobile abe enqobe kanzima hatshi kalula. Asingeke sikhale ngokwenzakeleyo njalo senelisile ukudlala siqede sinjalo,” kutsho uMasuku.
Emdlalweni olandelwe yilo owe Bulawayo City le Talen Vision iqembu le Bosso 90 linqobe ele Binga Pirates nge 3 ka 1 njalo abahlohlele iqembu le Bosso 90 ngu Dalubuhle Dlodlo yena ohlohle kabili kanye lo Dominic Jaricha.
Kweminye imidlalo eyesigaba se Southern Region Division One ezadlalwa ngoMgqibelo, iqembu le Indlovu Iyanyathela lizadlala lele Mosi Rovers ngase Khumalo Barracks ngehola letshumi lambili emini, kuthi iqembu le Toronto lizangqikilana lele Arenel Movers ngehola lesithathu emini enkundleni efanayo.
Iqembu le CIWU lizemukela ele Moto Moto ngase Crescent, iqembu Casmyn lizangqikilana lele Ajax Hotspurs ngase Turk Mine kuthi umdlalo obekumele ube phakathi kweqembu le Makomo lele Mainline udluliselwe phambili.
Sikhangele ukuba amaqembu azadlala njani kuviki lamatshumi amabili lanhlanu kusigaba se Castle Lager Premier Soocer League.
NgoMgqibelo iqembu le ZPC Kariba lizemukela ele FC Platinum ngase Nyamhunga, iqembu le Yadah lizadibana lele Ngezi Platinum Stars ngase Rufaro kuthi iqembu le Chicken Inn lizadlala lele Chapungu ngase Luveve.
NgeSonto iqembu le TelOne lizadlala lele Manica Diamonds ngase Ascot, iqembu le Dynamos lizemukela ele Bulawayo Chiefs ngase Rufaro, iqembu le Herentals lizangqikilana leqembu le Highlanders ngase National Sports Stadium, iqembu le Hwange lizadlala lele Black Rhinos ngase Colliery, iqembu le Mushowani Stars lizemukela ele CAPS United ngase Trojan Mine kuthi iqembu le Triangle United lizadlala lele Harare City ngase Gibbo.
Your browser doesn’t support HTML5
Udaba Siluphiwa nguJoseph Njanji