Uhulumende wakwele Melika ukhathezekile kakhulu ngokungenela kwezombusazwe okwenziwa libutho leZimbabwe osekudinga ukuthi kufakwe imigoqo yokuthi abakubutho kumele baqale bahlale isikhathi bengakavunyelwa ukungena kwezombusazwe.
Lokhu kuvele kuqula elizimeleyo ele Melika elethekelela eZimbabwe ngenyanga edluleyo elethulele uzulu weMelika ngokwenzakala eZimbabwe ngemva kombuso kaMnu. Robert Mugabe.
Owethule okuphathelane lezomvikela, uMnu. Allen Noyes, uthe akucaci ukuthi uMongameli Emmerson Mnangagwa nguye ophethe intambo zombuso kulandela ukugenqulwa esihlalweni okwenziwa uMugabe.
Esipha imbono yakhe, uNoyes uthe nxa ilizwe lifuna ukwenqabela ukungenela kwezombusazwe kwebutho kumele umuntu olisotsha aqale ahlale isikhathi esingafika umnyaka owodwa engakaphiwa isikhundla esifana lesikamsekeli kamongameli.
Ugcizelela ngokuthi eMelika isotsha lihlala iminyaka emithathu lingakavunyelwa ukungena kwezombusazwe.
Abantu akade besembuthanweni lo baphiwe ithuba lokubuza imibuzo omunye osakhulayo ovela eZimbabwe wabuza ukuthi uhulumende wele Melika umbona njani umkhokheli webandla leMDC-T, uMnu. Nelson Chamisa, ohlala ekhuluma amanga.
Ephendula lumbuzo, uMnu. Bruce Wharton, owayekuqula leli uthe uChamisa umbono engumuntu osebenza gadalala njalo okhuthelyo wavuma ukuthi kodwa kwesinye isikhathi uyake alahle umlomo.
Okunye okube ludaba olusegudwini yibudlelwano beMelika lamanye amazwe afana le China lele Bhilithane abanye abathe kukhanya ohulumende bamazwe la sebesekela uhulumende kaMnangagwa.
Ephendula lokhu, ilunga lequla leli, uMnu. Mark Bellamy uthe eleMelika alisoze liphange lilungisise ubudlelwano lohulumende kaMongameli Mnangagwa nxa kungalungisiswanga indaba eziphathelane lelungelo likazulu leminye imigoqo eyafakelwa ilizwe leZimbabwe nguhulumende weMelika.
Your browser doesn’t support HTML5
Udaba Silethulelwa Ngu Chris Gande