Amapholisa eBotswana athi asephezu kokucubungula udaba lokubulawa kowayeyisiphathamandla senkampani ye Air Zimbabwe, unkosikazi Shingai Dliwayo obulewe kabuhlungu eBotswana duze lomngcele owePlumtree.
Isikhulumi samapholisa eBotswana, umnunzana Dipheko Motube utshele iStudio 7 ukuthi baqhubeka becubungula udaba lukankosikazi Dliwayo kulandela ukutholakala kwesidumbu sakhe duze komngcele wePlumtree ngempelaviki.
UMotube uthi akukaveli okunengi ngemfa kaDliwayo, noma nje ebikwa wabizwa ngabantu eBotswana ukuzokhulumisana ngezebhizimusi. UMotube uthi abakalandeli umkhondo wokuthi kungabe kulabantu abaselomkhuba wokuhuga abantu bebayenga ngokuthi bababizela ukuzokhuluma ngezebhizimusi bathi bengafika elizweni kumbe bababulalele endleni bengachaphela kweleBotswana…
UDliwayo ubikwa etholakakele ebotshelwe esihlaleni, ebotshwe konke izandla lenyawo. Amapholisa aweZimbabwe abikwa esefikile ukuzoncedisa ekucubunguleni loludaba, bebambene izandla labanye babo abeBotswana.
Amaphephandaba amanengi, ikakhulu aweZimbabwe, abike ukuthi sekusesatshelwa ukuthi sekulezikliwi ezinxusa abantu kweleBotswana zithembisa ukukhuluma ngezebhizimusi, kanti inhloso yibugebengu.
IStudio 7 izame ukubamba ummmeli weZimbabwe kwele Botswana, umnumzana Thomas Mandigora, kodwa ihofisi yakhe ithe akekho elizweni okwamanye njalo akula omunye ongakhuluma lentathelizindaba ngalolu daba ngaphandle kwakhe.
Inengi labeZimbabwe liveze ukukhathazeka njalo lisele lithithibele ngalesi sehlakalo elizweni elilokuthula elifana leBotswana.
"Lokhu kuyasethusa. Kubuhlungu ukuthi impilo yakhe iphele ngendlela enje. Sithemba ukuthi yisehlakalo esizimele sodwa."
Kuhlala kubikwa ngokuqonga kokudalwa kwamacala amancane okutshontsha lokunye ezigabeni eziseduze lomgcele weZimbabwe, kodwa amacala okubulala abe engavamanga.
UDliwayo ube edabuka edolobheni elincane eleNorton eliduzane leHarare, njalo utshiye abantwana abathathu.
Your browser doesn’t support HTML5
Udaba lokubulawa kwesizalwane seZimbabwe eBotswana siluphiwa nguMartin Ngwenya